Kanadalik ko‘zi ojiz ayol noyob jarrohlik amaliyotidan so‘ng qisman ko‘rish qobiliyatiga ega bo‘ldi, deb yozmoqda The New York Post nashri. Uning chap ko‘z kosasiga o‘zidan olingan tishi jarrohlik yo‘li bilan o‘tkazilgan.
75 yoshli Geil Leyn o‘n yil avval avtoimmun kasallik tufayli ko‘rmay qolgan edi. U Kanadada osteo-odonto keratoprotez jarrohligi (“ko‘zga tish qo‘yish”)ni amalga oshirgan ilk uch nafar bemordan biri bo‘ldi.
Operatsiyadan so‘ng Leyn dastlab yorug‘likni payqay boshlagan, keyin uyidagi yordamchi iti — qora labradorning dumini silkitayotganini ko‘ra olgan. Uning so‘zlariga ko‘ra, shu kundan boshlab ko‘rish qobiliyati asta-sekin yaxshilanib bormoqda.
“Endi men ko‘plab ranglarni ajrata olyapman va tashqarini ko‘ra olyapman. Daraxtlar, maysalar va gullar bularning barini yana ko‘ra olish ajoyib tuyg‘u”, deydi ayol.
Operatsiyadan olti oy o‘tib Leyn ko‘rish qobiliyati yo‘qolgandan keyin tanishgan jufti Filning yuzini ham ko‘rishga muvaffaq bo‘ldi.
Vankuverdagi Mount Saint Joseph kasalxonasining oftalmologi doktor Greg Moloni bu noyob operatsiyani Kanadada birinchi bo‘lib amalga oshirgan shifokorlardan. Uning aytishicha, jarrohlik avvalida bemorning tishi olinib, bir necha oyga yonoq ichiga “ekiladi”. Shu vaqt ichida tish atrofida mustahkam to‘qima hosil bo‘ladi. So‘ng tish va uning atrofidagi to‘qima yonoqdan olinib, ko‘zning oq qismi ichida kichik teshik ochiladi va unga linza yoki plastik fokuslovchi teleskop joylanadi.
“Bu murakkab va noodatiy amaliyot, lekin uning asosiy vazifasi shox pardasini almashtirishdir. Asosiy maqsad — fokuslovchi teleskopni mustahkam ushlab turadigan, ammo organizm tomonidan rad etilmaydigan tuzilma yaratishdir”, deydi xirurg.
Izoh (0)