Tadqiqot: O‘zbekistonliklar oylik daromadini ko‘proq nimalarga sarflaydi?

Markaziy bank O‘zbekiston aholisi xarajatlari tarkibi va kelgusidagi kutilmalarini o‘rgandi. Shu bilan birga, tahlildan kreditga bo‘lgan talab hamda pul jamg‘arish imkoniyatlari ham o‘rin olgan.

Joriy yil II choragi bo‘yicha o‘tkazilgan so‘rovda 77 foiz (I chorakda 78 foiz) ishtirokchi kelgusi bir yilda xarajatlari ortishini kutayotganini aytgan.

Aholining barcha qatlamlarida uy-joy taʼmiri uchun xarajatlar yuqori ulushga ega bo‘lmoqda. Shu bilan birga, asosiy xarajatlar qatorida taʼlim va davolanish uchun qilinadigan chiqimlar yuqoriligicha qolyapti.

Yoshlar kesimida 18-30 yosh orasidagilar uy-joy taʼmiri, taʼlim xarajatlarini rejalashtirayotganini taʼkidlagan. O‘rta yosh vakillari (31-40 yoshlilar) ko‘proq uy-joy taʼmirlashini, 50 yoshdan kattalar davolanish va boshqa xarajatlari asosiy o‘rinda ekanini bildirgan.

Tahlil qilinishicha, aholi kelgusi chorakdagi eng ko‘p xarajatlari uy-joy taʼmirlash, taʼlim va sog‘liqni saqlash bilan bog‘liq bo‘lishini rejalashtirmoqda. Shuningdek, avtomobil xaridi, to‘y marosimlari va sayohat qilish kabi xarajatlar bo‘yicha kutilmalar ulushi ham yuqori shakllanmoqda. Bu kutilmalar kelgusida mazkur tovar va xizmatlarga bo‘lgan talab yuqori darajada qolishini ko‘rsatishi qayd etilgan.

Markaziy bank kelgusi 12 oyda kredit olishni rejalashtirayotganlar ulushi 56,5 foizni tashkil etganini maʼlum qilgan. Bu I chorakdagiga qaraganda 2,2 foizga kam.

“Kelgusida kredit olishni rejalashtirayotganlar ulushi o‘tgan chorakka nisbatan 7-15 million so‘mgacha hamda 20 million so‘mdan yuqori daromadli guruhlarda oshgan. 7 million so‘mgacha daromadli guruhlarda esa kamaygan”, deyiladi sharhda.

Shu bilan birga, 20 million so‘mdan yuqori daromadlilar qolgan guruhlarga nisbatan kelgusida kreditga bo‘lgan talablari kamayishini ko‘proq kutayotgani aniqlangan.

Kreditga ehtiyoji yuqorilar qarzni asosan uy-joy taʼmiri, taʼlim, davolanish, to‘y qilish va avtomobil sotib olishga sarflashini bildirgan.

So‘rovda qatnashganlar orasida pul jamg‘armasi ko‘payishini kutayotganlar ulushi 62,6 foizni tashkil etgan. Bu ko‘rsatkich o‘tgan yil mos choragiga nisbatan biroz yuqori.

Jamg‘armalari o‘zgarmasligini kutayotganlar ulushi 1,4 foizga oshib, 23 foizni tashkil etgan. Jamg‘armalari kamayishini kutayotganlar esa deyarli o‘zgarmagan va 14,4 foiz bo‘lgan.