Тадқиқот: Ўзбекистонликлар ойлик даромадини кўпроқ нималарга сарфлайди?

Марказий банк Ўзбекистон аҳолиси харажатлари таркиби ва келгусидаги кутилмаларини ўрганди. Шу билан бирга, таҳлилдан кредитга бўлган талаб ҳамда пул жамғариш имкониятлари ҳам ўрин олган.

Жорий йил II чораги бўйича ўтказилган сўровда 77 фоиз (I чоракда 78 фоиз) иштирокчи келгуси бир йилда харажатлари ортишини кутаётганини айтган.

Аҳолининг барча қатламларида уй-жой таъмири учун харажатлар юқори улушга эга бўлмоқда. Шу билан бирга, асосий харажатлар қаторида таълим ва даволаниш учун қилинадиган чиқимлар юқорилигича қоляпти.

Ёшлар кесимида 18-30 ёш орасидагилар уй-жой таъмири, таълим харажатларини режалаштираётганини таъкидлаган. Ўрта ёш вакиллари (31-40 ёшлилар) кўпроқ уй-жой таъмирлашини, 50 ёшдан катталар даволаниш ва бошқа харажатлари асосий ўринда эканини билдирган.

Таҳлил қилинишича, аҳоли келгуси чоракдаги энг кўп харажатлари уй-жой таъмирлаш, таълим ва соғлиқни сақлаш билан боғлиқ бўлишини режалаштирмоқда. Шунингдек, автомобиль хариди, тўй маросимлари ва саёҳат қилиш каби харажатлар бўйича кутилмалар улуши ҳам юқори шаклланмоқда. Бу кутилмалар келгусида мазкур товар ва хизматларга бўлган талаб юқори даражада қолишини кўрсатиши қайд этилган.

Марказий банк келгуси 12 ойда кредит олишни режалаштираётганлар улуши 56,5 фоизни ташкил этганини маълум қилган. Бу I чоракдагига қараганда 2,2 фоизга кам.

“Келгусида кредит олишни режалаштираётганлар улуши ўтган чоракка нисбатан 7-15 миллион сўмгача ҳамда 20 миллион сўмдан юқори даромадли гуруҳларда ошган. 7 миллион сўмгача даромадли гуруҳларда эса камайган”, дейилади шарҳда.

Шу билан бирга, 20 миллион сўмдан юқори даромадлилар қолган гуруҳларга нисбатан келгусида кредитга бўлган талаблари камайишини кўпроқ кутаётгани аниқланган.

Кредитга эҳтиёжи юқорилар қарзни асосан уй-жой таъмири, таълим, даволаниш, тўй қилиш ва автомобиль сотиб олишга сарфлашини билдирган.

Сўровда қатнашганлар орасида пул жамғармаси кўпайишини кутаётганлар улуши 62,6 фоизни ташкил этган. Бу кўрсаткич ўтган йил мос чорагига нисбатан бир оз юқори.

Жамғармалари ўзгармаслигини кутаётганлар улуши 1,4 фоизга ошиб, 23 фоизни ташкил этган. Жамғармалари камайишини кутаётганлар эса деярли ўзгармаган ва 14,4 фоиз бўлган.