Yo‘lovchi poyezdlarda qo‘shimcha servis xizmatlarini joriy etish, ularni yanada rivojlantirish, yo‘lovchi vagon parklarini yangilash, modernizatsiya qilish, yangi elektropoyezdlarni xarid qilish, vokzallarni zamon talablariga moslashtirishni hisobga olgan holda chiptalar narxiga o‘zgartirishlar kiritilmoqda. Bu haqda “O‘ztermiyo‘lyo‘lovchi” matbuot xizmati xabar berdi.
“O‘zbekiston temir yo‘llari” AJ 2024-yilning 1-iyul sanasidan mahalliy yo‘nalishlardagi yo‘lovchi poyezdlar — “Nasaf”, “Sharq”, “O‘zbekiston” poyezdlari chipta narxlarining tarif qismi 25 foizga oshirilishini maʼlum qiladi.
Misol tariqasida, 12, 4-sonli Toshkent—Qarshi yo‘nalishi avvalgi narxlari:
- ekonom — 150 ming 600 so‘m, biznes 218 ming 244 so‘m. Hozirgi narx: ekonom — 178 ming 250 so‘m, biznes — 262 ming 805 so‘mni tashkil qilmoqda.
Eslatib o‘tamiz, O‘zbekistonda 2024-yil 20-yanvardan boshlab yuqori tezlikda harakatlanuvchi “Afrosiyob” elektropoyezdlari hamda “Sharq”, “Nasaf” va “O‘zbekiston” tezyurar poyezdlarining chiptalar narxi 20 foizga oshgandi. 15-maydan boshlab esa yuqori tezlikda harakatlanuvchi “Afrosiyob” elektropoyezdlarining chiptalar narxlari ekonom klass 20 foiz, biznes klass 30 foiz va VIP klass 40 foiz miqdorda oshgan.
Izoh (0)