Mozori Sharif aholisi bu yil yomg‘ir yog‘magani uchun bug‘doy va un narxi oshishi mumkinligidan xavotirda.
Bu borada batafsil ma’lumot olish uchun “Daryo” muxbiri Mozori Sharifdagi eng yirik un va bug‘doy bozorlaridan biriga borib, sotuvchilar va shahar aholisi bilan suhbatlashdi.
Balx viloyati Sholg‘ara tumanida dehqonchilik bilan shug‘ullanayotgan Habibulla do‘stlaridan qarz olib, bug‘doy, jo‘xori, arpa yetishtirgani, ammo yog‘ingarchilik yetarli bo‘lmagani uchun barcha ekinlari qurib, nobud bo‘lganini aytadi.
Habibullaning aytishicha, bu yil Afg‘oniston da yog‘ingarchilik yetarli bo‘lmagani uchun bug‘doy va un narxi oshishi mumkin.U kelgusi yil ekin eka olmasligini aytdi.
Un va bug‘doy sotuvchilari Afg‘oniston da bu yilgi qurg‘oqchilik bozorga hech qanday ta’sir ko‘rsatmaydi, degan fikrda. Ularga ko‘ra, Afg‘oniston da un va bug‘doy narxi avvalgi yillarga nisbatan ancha arzonlashgan.
Un sotuvchilarning aytishicha, unning asosiy qismi Afg‘oniston bozorlariga Qozog‘iston va O‘zbekiston kabi qo‘shni davlatlardan keltiriladi.
Sotuvchilarga ko‘ra, o‘zbek unining eng ko‘p xaridori bor, uning narxi va sifati bozorga mos bo‘lgani uchun aholi ko‘proq sotib oladi.
Mozori Sharif shahridagi un savdosi bilan shug‘ullanuvchi hoji Omonullohning “Daryo” muxbiriga aytishicha, un va bug‘doy narxi bozordagi talab va taklifdan kelib chiqib belgilanadi, qachonki talab oshsa, narxlar oshadi va talab kamayganida narxlar pasayadi.
U Afg‘oniston ning dunyo bilan savdo aloqalari yaxshilanib borayotganini aytib, “avvallari Afg‘oniston bir yo‘nalishga qaram bo‘lib, qachonki bu yo‘l to‘sib qo‘yilgan bo‘lsa, tranzit va chegara muammolari paydo bo‘lib, narxlar keskin ko‘tarilib ketar edi, biroq so‘nggi yillarda Afg‘oniston ko‘plab davlatlar bilan bog‘lanib, un, bug‘doy kabi oziq-ovqat mahsulotlarini turli mamlakatlardan import qiladi”, deb qo‘shimcha qildi.
Shu bilan birga, bir qator un va bug‘doy sotuvchilar bozorda savdo pastligidan shikoyat qilmoqda.
Un sotuvchi hoji Nasrulloh do‘konini ertalab soat 7 da ochganini, soat 15:00 gacha bir kilogramm ham un sotmaganini aytadi.
Uning aytishicha, xalq iqtisodi juda zaif, odamlar unni juda ehtiyotkorlik bilan iste’mol qiladi, un sotib olish avvalgidek emas, Hayraton va Oqina portlarida, bozorlarda un ko‘p.
Nasrullohning fikricha, qurg‘oqchilik un va bug‘doy narxiga ta’sir qilmaydi. U un va bug‘doy arzon, lekin odamlar uni sotib olishga qurbi yetmasligini aytdi.
Afg‘oniston bozoridagi bug‘doy va un narxlari:
1 kilogramm Afg‘oniston bug‘doyi — 22 afg‘oni.
1 kilogramm chet el bug‘doyi — 25 afg‘oni.
1 kilogramm Afg‘oniston uni — 25 afg‘oni.
1 kilogramm chet el uni — 25-30 afg‘oni.
1 kilogramm arpa — 20 afg‘oni.
1 kilogramm makkajo‘xori — 40 afg‘oni.
1 kilogramm zig‘ir — 50 afg‘oni
1 kilo kunjut — 100 afg‘oni.
Izoh (0)