Мозори Шариф аҳолиси бу йил ёмғир ёғмагани учун буғдой ва ун нархи ошиши мумкинлигидан хавотирда.
Бу борада батафсил маълумот олиш учун “Дарё” мухбири Мозори Шарифдаги энг йирик ун ва буғдой бозорларидан бирига бориб, сотувчилар ва шаҳар аҳолиси билан суҳбатлашди.
Балх вилояти Шолғара туманида деҳқончилик билан шуғулланаётган Ҳабибулла дўстларидан қарз олиб, буғдой, жўхори, арпа етиштиргани, аммо ёғингарчилик етарли бўлмагани учун барча экинлари қуриб, нобуд бўлганини айтади.
Ҳабибулланинг айтишича, бу йил Афғонистон да ёғингарчилик етарли бўлмагани учун буғдой ва ун нархи ошиши мумкин.У келгуси йил экин эка олмаслигини айтди.
Ун ва буғдой сотувчилари Афғонистон да бу йилги қурғоқчилик бозорга ҳеч қандай таъсир кўрсатмайди, деган фикрда. Уларга кўра, Афғонистон да ун ва буғдой нархи аввалги йилларга нисбатан анча арзонлашган.
Ун сотувчиларнинг айтишича, уннинг асосий қисми Афғонистон бозорларига Қозоғистон ва Ўзбекистон каби қўшни давлатлардан келтирилади.
Сотувчиларга кўра, ўзбек унининг энг кўп харидори бор, унинг нархи ва сифати бозорга мос бўлгани учун аҳоли кўпроқ сотиб олади.
Мозори Шариф шаҳридаги ун савдоси билан шуғулланувчи ҳожи Омонуллоҳнинг “Дарё” мухбирига айтишича, ун ва буғдой нархи бозордаги талаб ва таклифдан келиб чиқиб белгиланади, қачонки талаб ошса, нархлар ошади ва талаб камайганида нархлар пасаяди.
У Афғонистон нинг дунё билан савдо алоқалари яхшиланиб бораётганини айтиб, “авваллари Афғонистон бир йўналишга қарам бўлиб, қачонки бу йўл тўсиб қўйилган бўлса, транзит ва чегара муаммолари пайдо бўлиб, нархлар кескин кўтарилиб кетар эди, бироқ сўнгги йилларда Афғонистон кўплаб давлатлар билан боғланиб, ун, буғдой каби озиқ-овқат маҳсулотларини турли мамлакатлардан импорт қилади”, деб қўшимча қилди.
Шу билан бирга, бир қатор ун ва буғдой сотувчилар бозорда савдо пастлигидан шикоят қилмоқда.
Ун сотувчи ҳожи Насруллоҳ дўконини эрталаб соат 7 да очганини, соат 15:00 гача бир килограмм ҳам ун сотмаганини айтади.
Унинг айтишича, халқ иқтисоди жуда заиф, одамлар унни жуда эҳтиёткорлик билан истеъмол қилади, ун сотиб олиш аввалгидек эмас, Ҳайратон ва Оқина портларида, бозорларда ун кўп.
Насруллоҳнинг фикрича, қурғоқчилик ун ва буғдой нархига таъсир қилмайди. У ун ва буғдой арзон, лекин одамлар уни сотиб олишга қурби етмаслигини айтди.
Афғонистон бозоридаги буғдой ва ун нархлари:
1 килограмм Афғонистон буғдойи — 22 афғони.
1 килограмм чет эл буғдойи — 25 афғони.
1 килограмм Афғонистон уни — 25 афғони.
1 килограмм чет эл уни — 25-30 афғони.
1 килограмм арпа — 20 афғони.
1 килограмм маккажўхори — 40 афғони.
1 килограмм зиғир — 50 афғони
1 кило кунжут — 100 афғони.
Изоҳ (0)