Vashington huquq firmasi Suriya qamoqxonasida 63 kun saqlanib, qiynoqqa solingan AQSH fuqarosi sababli mamlakatga 20 million dollardan ortiq jarima soldi. Bu haqda Fox News xabar berdi.
AQSHning Okrug sudyasi Kollegin Kollar-Kotelli jabrlanuvchiga 20,201,620 dollar miqdorida tovon puli berish haqida qaror chiqargan. Bu pulning yarmi — taxminan 10 million dollari — zararni qoplash uchun sarflanadi. Qolgani esa tovon sifatida belgilangan.
Summaning taxminan yarmi AQSHning “Davlat homiyligidagi terrorizm qurbonlari jamg‘armasi” orqali to‘lanadi. Bu jamg‘arma sanksiyalar natijasida yig‘ilgan pullar va boshqa jarimalar hisobidan moliyalashtiriladi. Unda qancha pul borligiga qarab jabrlanuvchi bir necha yil davomida kompensatsiya pulining ma’lum foizini olishi mumkin.
“Xalqaro inson huquqlarini buzgan davlatlar jazoga tortilishi kerak. Sam kabi jasur, omon qolganlar esa Asad rejimining zulmlarini dunyo unutmasligini ta’minlaydi”, dedi jabrlanuvchining advokati Kirbi Behre.
Advokatning aytishicha, Gudvin Suriyaning sobiq prezidenti Bashar Asad boshchiligidagi hokimiyat davrida Branch 215 deb ataluvchi joyda qiynoqqa solingan va uzoq so‘roq qilingan. Gudvin soxta josuslik ayblovini tan olishdan bosh tortganida, so‘roq qilayotgan xodim uni ISHIDga topshirish bilan tahdid qilgan.
Uning ozod qilinishi Livanning eng yuqori xavfsizlik amaldori bo‘lgan general Abbos Ibrohim tomonidan ta’minlangan. Gudvinning oilasi FQB, Markaziy razvedka boshqarmasi, davlat departamenti, prezidentning garovga olinganlar ishlari bo‘yicha maxsus vakili, Vatikan elchilari, Yaqin Sharq ekspertlari va boshqalar bilan hamkorlik qilib, uni uyga qaytarish uchun tinimsiz harakat qilgan.
“Bu sud qarori faqat menga bo‘lgan munosabat emas. Bu butun dunyoda inson huquqlari buzilganlar uchun kurashdir. Umid qilamanki, bu boshqa jabrlanganlarga jasorat bag‘ishlaydi. Eng muhimi, bunday jinoyatlar kechirilmasligini va unutilmasligini eslatib turadi”, dedi Gudvin intervyuda.
Izoh (0)