“Tolibon” harakati Afg‘onistondagi yagona kinematografiya tashkiloti hisoblangan Afghan Film davlat kinostudiyasini tarqatib yubordi. Kinostudiya ofisi yopildi. Bu haqda manbalarga tayanib “Amu.tv” xabar berdi.
“Tolibon” bu borada rasmiy bayonot bermagan. Biroq xodimlar muassasa tugatilgani va faoliyati to‘xtatilgani haqida ogohlantirilgan.
Afg‘onistonda badiiy hayot butunlay barbod bo‘ldi. Afghan Film shunchaki bino emas edi — u kinematografik xotiramizni asrashga mas’ul edi, dedi xavfsizlik nuqtayi nazaridan noma’lum qolishni istagan kobullik rejissyorlardan biri.
Muassasaning yopilishi “Tolibon” tomonidan Afg‘onistonda madaniy va ko‘ngilochar hayotning keng miqyosda bostirilib, ayollar huquq va erkinliklarining cheklanishi sharoitida sodir bo‘ldi. 2021-yil avgust oyida “Tolibon” hokimiyatga qaytganidan so‘ng, jamoat joylarida qo‘shiq aytish, cholg‘u asboblarini chalish, jonli mavjudotlarni tasvirlash man etildi, san’atkorlar esa surgun va tahdidlarga duchor bo‘ldi.
Afghan Film kinostudiyasi 1968-yilda shoh Muhammad Zohirshoh hukmronligi davrida tashkil etilgan. U 1970-yillardagi kino xronikalaridan tortib, respublika davridagi to‘liq metrajli badiiy filmlargacha bo‘lgan mamlakatning vizual tarixini saqlab qolishda muhim rol o‘ynadi.
Muassasada fuqarolar urushi va 1990-yillarda “Tolibon”ning birinchi hukmronligi davrida yo‘q qilinishining oldini olish uchun yashirilgan yoki kontrabanda yo‘li bilan chet elga olib ketilgan qimmatbaho kino arxivi ham saqlangan.
2021-yilda respublika qulashidan oldin Afghan Film Axborot va madaniyat vazirligi homiyligida faoliyat yuritgan. Faoliyatining so‘nggi yillarida kinostudiya o‘z kolleksiyasini modernizatsiya qilish va raqamlashtirish bo‘yicha loyihalarni amalga oshirgan.
Avvalgi hukumat davrida Afghan Filmʼning so‘nggi rahbari Sahra Karimiy bo‘lib, u 2021-yil avgust oyida “Tolibon” Kobul ustidan nazoratni qo‘lga kiritganida mamlakatdan qochib ketgan. O‘shandan beri kinostudiya e’tiborga molik faoliyat yuritmagandi.
Izoh (0)