Manfaatlar to‘qnashuvi reyestriga Prezident administratsiyasidan tortib barcha idoralar kiritiladi — Akmal Burxonov

Korrupsiyaga qarshi kurashish agentligi direktori Akmal Burxonov “Manfaatlar to‘qnashuvi to‘g‘risida”gi qonun kimlarga qo‘llanishi haqida izoh berdi. Bu haqda “Daryo” muxbiri xabar bermoqda.

Hukumat a’zolari ham, Parlament a’zolari ham, Prezident administratsiyasidan tortib hammaga tatbiq etiladi. Sud bo‘ladimi, harbiy tuzilmalar bo‘ladimi — barchasini qamrab oladi.

Qaysidir ijtimoiy tarmoqda qonun harbiylarga tatbiq etilmaydi, degan jumlaga ko‘zim tushib qoldi. Yo‘q, unday emas, barchaga taalluqli. Biz bularning ro‘yxatini shakllantiramiz, — dedi agentlik direktori.

Akmal Burxonovning tushuntirishicha, “Davlat fuqarolik xizmati to‘g‘risida”gi qonundan farqli o‘laroq, “Manfaatlar to‘qnashuvi to‘g‘risida”gi qonun davlat organlari va tashkilotlarining barchasini, ya’ni 28 mingta idorani qamrab oladi.

• Avvalroq manfaatlar to‘qnashuvi natijasida yetkazilgan zararni qonunbuzar mansabdor shaxs o‘z cho‘ntagidan to‘lashi ma’lum qilingan edi.

Ushbu qonun davlat organlariga va mahalliy davlat hokimiyati organlariga, davlat muassasalariga, davlat unitar korxonalariga, davlat maqsadli jamg‘armalariga, shuningdek ustav fondida (ustav kapitalida) davlat ulushi 50 foiz miqdorda va undan ortiq bo‘lgan aksiyadorlik jamiyatlariga nisbatan tatbiq etiladi.

Qonunda davlat organining yoki boshqa tashkilotning xodimi, manfaatlar to‘qnashuvi, manfaatlar to‘qnashuvini tartibga solish bo‘yicha maxsus bo‘linma, shaxsiy manfaatdorlik, yaqin qarindoshlar kabi asosiy tushunchalar kiritildi.

Quyidagi shaxslar davlat organining yoki boshqa tashkilotning xodimiga aloqador shaxslar deb eʼtirof etiladi:

• davlat organi yoki boshqa tashkilot xodimining yaqin qarindoshlari;
• davlat organining yoki boshqa tashkilotning xodimi va (yoki) uning yaqin qarindoshlari qaysi yuridik shaxsning ustav fondi (ustav kapitali) aksiyalariga yoki ulushlariga egalik qilsa, o‘sha yuridik shaxs;
• davlat organining yoki boshqa tashkilotning xodimi yoxud uning yaqin qarindoshlari qaysi yuridik shaxsda boshqaruv organining rahbari yoki aʼzosi bo‘lsa, o‘sha yuridik shaxs.