Коррупцияга қарши курашиш агентлиги директори Акмал Бурхонов “Манфаатлар тўқнашуви тўғрисида”ги қонун кимларга қўлланиши ҳақида изоҳ берди. Бу ҳақда “Дарё” мухбири хабар бермоқда.
Ҳукумат аъзолари ҳам, Парламент аъзолари ҳам, Президент администрациясидан тортиб ҳаммага татбиқ этилади. Суд бўладими, ҳарбий тузилмалар бўладими — барчасини қамраб олади.
Қайсидир ижтимоий тармоқда қонун ҳарбийларга татбиқ этилмайди, деган жумлага кўзим тушиб қолди. Йўқ, ундай эмас, барчага тааллуқли. Биз буларнинг рўйхатини шакллантирамиз, — деди агентлик директори.
Акмал Бурхоновнинг тушунтиришича, “Давлат фуқаролик хизмати тўғрисида”ги қонундан фарқли ўлароқ, “Манфаатлар тўқнашуви тўғрисида”ги қонун давлат органлари ва ташкилотларининг барчасини, яъни 28 мингта идорани қамраб олади.
- Аввалроқ манфаатлар тўқнашуви натижасида етказилган зарарни қонунбузар мансабдор шахс ўз чўнтагидан тўлаши маълум қилинган эди.
Ушбу қонун давлат органларига ва маҳаллий давлат ҳокимияти органларига, давлат муассасаларига, давлат унитар корхоналарига, давлат мақсадли жамғармаларига, шунингдек устав фондида (устав капиталида) давлат улуши 50 фоиз миқдорда ва ундан ортиқ бўлган акциядорлик жамиятларига нисбатан татбиқ этилади.
Қонунда давлат органининг ёки бошқа ташкилотнинг ходими, манфаатлар тўқнашуви, манфаатлар тўқнашувини тартибга солиш бўйича махсус бўлинма, шахсий манфаатдорлик, яқин қариндошлар каби асосий тушунчалар киритилди.
Қуйидаги шахслар давлат органининг ёки бошқа ташкилотнинг ходимига алоқадор шахслар деб эътироф этилади:
- давлат органи ёки бошқа ташкилот ходимининг яқин қариндошлари;
- давлат органининг ёки бошқа ташкилотнинг ходими ва (ёки) унинг яқин қариндошлари қайси юридик шахснинг устав фонди (устав капитали) акцияларига ёки улушларига эгалик қилса, ўша юридик шахс;
- давлат органининг ёки бошқа ташкилотнинг ходими ёхуд унинг яқин қариндошлари қайси юридик шахсда бошқарув органининг раҳбари ёки аъзоси бўлса, ўша юридик шахс.
Изоҳ (0)