O‘zbekiston oltin-valyuta zaxiralari qiymati bir yilda 14,1 mlrd dollarga ko‘paydi

Mamlakat xalqaro zaxiralari qiymati bir yilda 14,1 mlrd dollarga ko‘paydi. Bu haqda Markaziy bank eʼlon qilgan statistik raqamlardan ko‘rish mumkin.

Joriy yil 1-may holatiga ko‘ra, respublika oltin-valyuta zaxiralari qiymati 49 mlrd 255 mln dollarga yetdi. Bu tarixiy rekord ko‘rsatkich hisoblanib, zaxiralarning 37 mlrd 652 mln dollari oltin hissasiga to‘g‘ri kelgan.

Aslida zaxiralar tarkibida oltin miqdori kamayib borgan. Qiymat o‘sishi esa qimmatbaho metall narxi ko‘tarilishi bilan bog‘liq. Masalan, 2025-yil boshida 12,3 mln troy unsiya (382,5 tonna) oltin zaxira bor edi. May oyiga kelib, bu ko‘rsatkich 11,5 mln troy unsiyaga (356,4 tonna) kamaygan. Bu to‘rt oy ichida taxminan 24,9 tonna oltin sotilganini anglatadi.

Bir yil ilgari, yaʼni 2024-yil 1-may kuni ham xuddi shuncha miqdor (11,46 mln troy unsiya) qayd etilgan.

Xalqaro zaxiralar qiymati 2022-yil mayida 35,6 mlrd dollarni, 2023-yil mos davrida 35,2 mlrd dollarni tashkil etgan. 2024-yil noyabr oyiga kelibgina mazkur qiymat 40 mlrd dollardan orta boshlagan. Joriy yil may oyi holatiga oltin miqdori kamaygan bo‘lsa-da, qiymati ortishi natijasida o‘tgan yil noyabrigacha bo‘lgan ko‘rsatkichlardan yuqori darajaga chiqdi (37 mlrd 652 mln dollari).

2025-yil I choragida Markaziy bank qariyb 3 mlrd 570 mln dollarlik oltin eksport qilgan. Bu miqdor mamlakat uch oylik jami eksportining 44 foiziga teng. O‘tgan yillar ilk choraklaridagi ko‘rsatkichlar bilan taqqoslaganda mazkur qiymat ancha yuqori hisoblanadi. Masalan, 2024-yilning ilk uch oyida respublika 2 mrld 664 mln dollarlik oltin sotgandi.