2025-yil 1-choragida respublika umumiy eksport tushumining 44 foizi oltin hissasiga to‘g‘ri keldi. Bu haqda Statistika qo‘mitasi maʼlum qildi.
Joriy yil yanvar–mart oylarida O‘zbekiston eksporti hajmi 8,1 mlrd dollarni tashkil etib, 2024-yil mos davridagidan 24,4 foizga ko‘paydi. Mazkur o‘sish Markaziy bank oltinni yuqori qiymatda sotgani bilan bog‘liq.
Dastlabki chorakda mamlakat qariyb 3 mlrd 570 mln dollarlik oltin eksport qildi (jami eksportning 44 foizi). O‘tgan yillar ilk choraklaridagi ko‘rsatkichlar bilan taqqoslaganda bu ancha yuqori qiymat hisoblanadi. Masalan, 2024-yilning ilk uch oyida 2 mrld 664 mln dollarlik oltin sotilgan.
Hatto mutlaq rekord darajada (8,1 mlrd dollarlik) oltin eksport qilingan 2023-yilning yanvar–mart oylarida ham 2,4 mlrd dollarlik qimmatbaho metall sotilgandi.
Respublika 2021-yil mos davrida 1 mlrd dollarlik, 2022-yil 1-choragida 2 mlrd 970 mln dollarlik oltin eksport qilgan. 2020-yil mos davrida qimmatbaho metall sotilmagan.
Qolgan yillar 1-choraklaridagi oltin sotuvlari qiymati quyidagicha bo‘lgan:
- 2015-yil 823,9 mln dollar;
- 2016-yil 375,1 mln dollar;
- 2017-yil 388,7 mln dollar;
- 2018-yil 1,3 mlrd dollar;
- 2019-yil 1,2 mlrd dollar.
Avvalroq Markaziy bank joriy yil fevralida 1,73 mlrd dollarlik qimmatbaho metallni xorijga eksport qilgani, yanvarda esa oltin sotilmagani xabar qilingandi. Bundan chiqdi, mart oyining o‘zida 1,8 mlrd dollardan ortiq qiymatda oltin eksport qilingan.
Eslatib o‘tamiz, 2025-yilning 22-aprel holatiga oltinning xalqaro narxi tarixiy rekord darajada qimmatlashib, bir unsiyasi uchun 3509 dollarga yetdi. Keyinchalik narx biroz pasaygan.
Izoh (0)