Qashqadaryo viloyati hokimi Murodjon Azimov Parij Paralimpiya o‘yinlari bronza medali sohibi Dovurxon Karomatovga ikki xonali uy sovg‘a qilgandi. Mazkur uyni qurgan quruvchi hokimliklardan sovg‘a qilingan xonadon pulini ololmay sarson bo‘lmoqda. Tadbirkor bu haqda Koson tumani hokimi va Murodjon Azimovga qayta-qayta murojaat qilgan. Biroq natijaga erishmagan.
Maʼlum bo‘lishicha, 2025-yilning 11-aprel kuni tadbirkor Koson tumani hokimi Asrol Boyqarayev hamda Qashqadaryo viloyati rahbari Murodjon Azimovga murojaatnoma yo‘llagan.
Hozirgi kunda Karomatov Dovurxon Fozil o‘g‘li mulk huquqi mavjud bo‘lmasa-da, ushbu xonadonni asossiz ravishda egallab kelmoqda. Biroq shu kunga qadar xonadon uchun to‘lov Koson tumani hokimiyatiga bir necha bor murojaat qilishimizga qaramasdan amalga oshirilmasdan kelinmoqda. To‘lov bo‘lmagani sababli xonadon Prof star lider xususiy korxonasi balansida turibdi. Boshqa barcha xonadonlar sotilib, faqatgina ushbu xonadon balansda turgani sababli qo‘shimcha soliqlar va boshqa to‘lovlar kelib chiqmoqda, deyiladi korxona rahbari Bahrom Rahmonovning hokimlarga yo‘llagan murojaatida.
-ZGWKXgRF (1)-_r7hJGmr.avif)
Tadbirkor hokimliklarga murojaat qilar ekan, 51,05 metr/kvadratga ega xonadon uchun darhol to‘lov qilinishi kerakligini, agar uyning puli to‘lanmasa, xonadon kalitini qaytarib berishlarini so‘ragan.
Xonadon kaliti qaytarib berilishini va Karomatov Dovurxon ushbu xonadondan buyumlarini olib ketishini taʼminlashingizni iltimos qilaman, deydi tadbirkor.
Tadbirkorning qo‘shimcha qilishicha, u shu muammo sabab sakkiz oydan beri Koson tumani hokimligi hamda viloyat hokimligi “eshigini qoqadi”. Ammo hech qanday natijaga erishmaydi.
Koson tumani hokimining qabuliga kirib bo‘lmaydi. Mazkur muammo bilan shug‘ullangan birinchi o‘rinbosar “bir haftadan keyin beramiz, o‘n kundan keyin beramiz”, deb vaʼda berishdan nariga o‘tmaydi, deydi u.
“Daryo” Parij Paralimpiya o‘yinlari bronza medali sohibiga sovg‘a qilingan uyning puli to‘lanmagani yuzasidan Koson tumani hokimligi axborot xizmati bilan bog‘landi. Masʼul tuman hokimi bilan suhbatlashib, vaziyatga aniqlik kiritishini maʼlum qildi.
Izoh (0)