Навоий вилоятининг Қизилтепа тумани ҳокими ўринбосари Ўлмас Истамов ташкилот раҳбарларини “Ташаббусли бюджет”га овоз йиғишга мажбурлагани учун жаримага тортилди.
Ҳолатни назоратга олган Одам савдосига қарши курашиш ва муносиб меҳнат масалалари бўйича миллий комиссиянинг маълум қилишича, ҳолат атрофлича ўрганилди.
Ўрганиш натижаларига кўра, Қизилтепа тумани ҳокимининг ёшлар ва ижтимоий ривожлантириш, маънавий ва маърифий ишлар бўйича ўринбосари ташкилот раҳбарларининг хизмат вазифаларига кирмайдиган ташаббусли бюджет лойиҳасига овоз йиғишга тарғиб қилгани ва мажбуран жалб қилгани аниқланган.
Бош прокуратура ҳамда Давлат меҳнат инспекцияси ходимлари томонидан ўтказилган ўрганишда ҳоким ўринбосарининг ҳаракатларида Маъмурий жавобгарлик тўғрисидаги кодекснинг тегишли моддаларида кўрсатилган ҳуқуқбузарлик аломатлари аниқланган. Ўрганиш натижаларидан келиб чиққан ҳолда мансабдор шахсга нисбатан ушбу кодекснинг 51-моддаси 1-қисми билан жарима жазоси тайинланди.
Ушбу моддага кўра, меҳнатга бирор-бир шаклда маъмурий тарзда мажбурлаш БҲМнинг 50 бараваридан 100 бараваригача (17 миллион сўмдан 34 миллион сўмгача) миқдорда жарима солишга сабаб бўлиши белгиланган. Хабарда ҳоким ўринбосари қанча жаримага тортилганига аниқлик киритилмаган.
Эслатиб ўтамиз, Ўлмас Истамов ташкилот раҳбарларига кун давомида 50 тадан овоз йиғмаса, ишдан олиш билан таҳдид қилганди. Унинг йиғилишда айтган гаплари ёзиб олинган аудио ижтимоий тармоқларда тарқалганди.
Маълумот учун, Ўлмас Истамов 2022 йилнинг февраль ойидан буён туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келмоқда. Ундан аввал туманда халқ таълими бўлими мудири бўлиб ишлаган.
Изоҳ (0)