Тошкент вилоятининг Бекобод туманида 28 ёшли аёл ўзини 5-қаватдан ташлаб вафот этгани, марҳуманинг яқинлари бунга зўравон эр айбдорлигини айтгани ҳақида хабар берилганди. Бош прокуратура ахборот хизмати раҳбари Ҳаёт Шамсутдиновнинг “Дарё”га билдиришича, воқеа юзасидан жиноят иши қўзғатилган.
Мазкур ҳолат юзасидан Бекобод туман прокуратураси томонидан терговга қадар текширув ҳаракатлари олиб борилиб, ўрганиш хулосаларига кўра Жиноят кодексининг 103-моддаси 2-қисми “а” (моддий томондан ёки бошқа жиҳатлардан айбдорга қарам бўлган шахсни ўзини ўзи ўлдириш даражасига етказиш) банди билан жиноят иши қўзғатилган, — дейилади Бош прокуратура ахборот хизмати берган маълумотда.
Ҳозирда аёлнинг ўлими юзасидан тергов ҳаракатлари олиб борилмоқда.
2024 йилнинг 27 март куни соат 21:30 ларда Тошкент вилоятининг Бекобод туманида яшовчи, икки фарзанднинг онаси Н.Х. яшаш хонадонининг 5-қаватидан ўзини ташлаб, ўз жонига қасд қилганди.
Яқинларининг айтишича, аёлнинг турмуши нотинч бўлган, эри уни ваҳшийларча калтаклаб келган. Тўққиз йиллик турмушнинг бор-йўғи уч йилини эриникида яшаган. Лекин шу орада уч марта ҳимоя ордери берилган бўлса ҳам, зўравонга бирор чора кўрилмаган.
Изоҳ (0)