Экология вазири маслаҳатчиси, жамоатчилик фаоли Расул Кушербаев пойтахтда туман экология бўлими масъуллари ИИБ ходимлари ҳамда прокуратура органи томонидан қўшиб ёзишга мажбурланаётгани, буни бажармаган масъуллар 10 соатлаб ИИБ биносида ноқонуний ушлаб турилганини хабар қилганди. Тошкент шаҳар прокуратураси ахборот хизмати раҳбари Хуршида Раҳмонованинг “Дарё”га билдиришича, ҳолат Тошкент шаҳар прокурори Эркин Йўлдошев назоратига олинган.
Воқеа ҳақида хабар берилгач, шу заҳоти бу ҳақда шаҳар прокурорига маълумот киритдик. Ҳолат прокурор назоратига олинди ва ўрганиш жараёнида, — дейди пойтахт прокуратураси ахборот хизмати раҳбари Хуршида Раҳмонова.
Вазир маслаҳатчисига кўра, қўшиб ёзишга мажбурланганлардан бири — Яккасарой тумани экология бўлими бошлиғи Камолиддин Бектурганов 2024 йилнинг 29 март куни тунги соат 03:00 да Ички ишлар бўлими ходимлари томонидан уйидан олиб кетилиб, экилмаган дарахтларни “Яшил макон” платформасига киритиб, тасдиқлаши талаб қилинган. У чамаси 10 соатлар ички ишлар ходимлари томонидан ноқонуний ушлаб турилган.
“Дарё” журналисти билан суҳбатда бўлган Яккасарой туман Экология бўлими бошлиғи Камолиддин Бектурганов ҳақиқатан ҳам ўша куни экилмаган кўчатларни экилди деб тасдиқлашга мажбурланганини айтди.
Шу иш бўйича ҳозир Тошкент шаҳар прокуратурасига ҳам чақирилганмиз. Келдик, — дейди пойтахт прокуратурасига чақирилганини айтган туман экологияси бошлиғи.
Тошкент шаҳар ИИББ ахборот хизмати масъуллари “Дарё”нинг бу ҳақдаги саволига жавоб берар экан, Тошкент шаҳар ИИББ раҳбарияти бундай ҳолатни билса, албатта, бунга етарлича жавоб беришини айтиб, ҳолатни ўрганишини ва тез орада батафсил маълумот беришини билдирди.
Кушербаевнинг билдиришича, белгиланган режа бўйича Тошкент шаҳрида баҳор мавсумида 600 минг дона кўчат экилиши керак.
Тартибга кўра, экилган кўчатлар туман ҳокимликларидаги штаблар томонидан “Яшил макон” платформасига киритилади. Сўнгра бу маълумот туман экология бўлими ходимлари томонидан жойига бориб текширилгач, тасдиқланади. Ўтган вақтда пойтахтда “Яшил макон” платформасига киритилиб, ҳақиқатда экилмаган 41 мингдан ортиқ кўчатларни экология ходимлари тасдиқлашмаган. Бу эса туман ҳокимликлари, ИИБ ва прокуратура томонидан экология ходимларига босим ўтказилишига олиб келган, — дейди Расул Кушербаев.
Вазирлик масъулига кўра, Учтепа тумани ҳокимлиги эса туман Экология бўлими ходимларини офисига киритмай, уларга босим ҳам ўтказган.
“Дарё” журналисти билан суҳбатлашган Учтепа туман Экология бўлими бошлиғи Ўктам Ўткиров меҳнат таътилида бўлгани боис бу воқеадан хабари йўқлигини, ходимларига босим бўлган ёки бўлмаганидан бехабар эканини айтди.
Ўктам Ўткиров туман Экология бўлими ҳокимият балансидаги биноларнинг биридан қўним топганини, ходимлари ўша ерда фаолият юритишини тасдиқлади. Учтепа тумани ҳокимлиги ахборот хизмати раҳбари Тўра Тўраев эса воқеани батафсил ўргангач, маълумот беришини қўшимча қилди.
Вазир маслаҳатчисининг ёзишича, экологларга қўшиб ёзиш ҳақида топшириқ берганлар орасида прокуратура ходимлари ҳам бор.
30 март куни кундузги соат 10:00 да Шайхонтоҳур туман Экология бўлими бошлиғи Х.Мираҳмедов чамаси уч соатлар туман прокуратурасида ноқонуний ушлаб турилиб, экилмаган дарахтларни “Яшил макон” платформасига киритиш ҳамда тасдиқлаш талаб қилинган, — дейди Расул Кушербаев.
Таҳририят Шайхонтоҳур туман Экология бўлими масъулини тополмади. Ундан қўшимча маълумот олиш имкони бўлмади.
“Дарё” воқеалар ривожини кузатишда давом этади.
Изоҳ (0)