Тошкент шаҳрида автобус ҳайдовчиси эшикка қисилиб қолган йўловчини бир неча метрга судраб кетгани акс этган видео тарқалди. “Тошшаҳартрансхизмат” ҳолат юзасидан муносабат билдирди.
Ҳайдовчининг сўзларига кўра, кекса эркак тўсатдан автобусдан тушган. У эшикларни ёпгач, ҳаракатда давом этаётган вақтида буни пайқаб қолган ва дарҳол автобусни тўхтатган. Йўловчи ҳаммаси яхши эканини билдиргач, яна автобусга миниб, йўлида давом этган.
“145-мактаб бекатига яқинлашиб келганимда бекатда йўловчларни туширганимдан сўнг, ҳаракатни давом эттириш вақтида эшикларни ёпдим. Шу пайт орқа эшикдан тўсатдан ёши улуғ инсон тушиб қолди. Буни сезмай қолдим. Ҳаракатни давом эттирдим, кейин тўхтадим. Олдига бориб, вазиятни тушунтирганимда болам, сен кетавер, ўзимда ҳам хато бўлди, ҳаммаси яхши, деганларидан кейин автобусга ўтириб, яна йўналишимни давом эттириб кетдим. Ҳолат бошқа такрорланмайди. Ҳаммадан узр сўрайман”, — дейди ҳайдовчи.
Маълум қилинишича, ҳайдовчи билан тузилган меҳнат шартномаси бекор қилинган. Бошқа барча ҳайдовчилар билан тушунтириш ишлари олиб борилган.
Изоҳ (0)