Тошкентда белгиланмаган жойларга чиқинди ташлаганлардан 1 кунда қанча жарима ундирилгани маълум қилинди

Тошкент шаҳрида белгиланмаган жойларга чиқинди ташлаётганлар қарши оммавий рейд бошлангани эълон қилинганди. Бир кунда ўтказилган рейд давомида қоидабузарлардан жами 11 миллион сўмдан ортиқ жарима ундирилди.

Экология, атроф-муҳитни муҳофаза қилиш ва иқлим ўзгариши вазирлигининг маълум қилишича, 12 март куни ўтказилган рейд давомида пойтахт ҳудудида бир куннинг ўзида чиқинди ташлаш билан боғлиқ 16 та ҳуқуқбузарлик аниқланди.

Ҳуқуқбузарларга Маъмурий жавобгарлик тўғрисидаги кодекснинг 91-1-моддаси 1-қисми билан маъмурий баённома расмийлаштирилди ва жами 11 миллион 375 минг сўм жарима қўлланилди.

Айни пайтда рейд тадбирлари давом эттирилмоқда. Ушбу рейдлар ҳуқуқ-тартибот органлари билан ҳамкорликда олиб борилмоқда.

Чиқиндиларини белгиланмаган жойларга ташлаганлик учун жарима миқдори

Маъмурий жавобгарлик тўғрисидаги кодекснинг 91-1-моддасига кўра, белгиланмаган жойларга қаттиқ маиший ва қурилиш чиқиндиларини ташлаш, шунингдек суюқ маиший чиқиндиларни тўкиш

• фуқароларга БҲМнинг 1 бараваридан 3 бараваригача (375 минг сўмдан 1 миллион 125 минг сўмгача),
• мансабдорларга эса 10 бараваридан 20 бараваригача (3 миллион 750 минг сўмдан 7 миллион 500 минг сўмгача) миқдорда жарима солишга сабаб бўлади.

Худди шундай ҳуқуқбузарлик маъмурий жазо чораси қўлланганидан кейин бир йил давомида такрор содир этилса:

• фуқароларга БҲМнинг 5 бараваридан 10 бараваригача (1 миллион 875 минг сўмдан 3 миллион 750 минг сўмгача )
• мансабдорларга БҲМнинг 20 бараваридан 30 бараваригача (7 миллион 500 минг сўмдан 11 миллион 250 минг сўмгача) миқдорда жарима солинади.

Маиший ва қурилиш чиқиндилари полигонларига жойлаштирилиши керак бўлган чиқиндиларни белгиланмаган жойларга ташлаш

• фуқароларга БҲМнинг 5 бараваридан 10 бараваригача,
• мансабдорларга БҲМнинг 20 бараваридан 30 бараваригача миқдорда жарима солишга сабаб бўлади.

Ҳуқуқбузарлик 1 йил давомида такрор содир этилса, фуқароларга БҲМнинг 10 бараваридан 15 бараваригача (375 минг сўмдан 5 миллион 620 минг сўмгача), мансабдорларга эса 30 бараваридан 50 бараваригача (11 миллион 250 минг сўмдан 18 миллион 750 минг сўмгача) миқдорда жарима тайинланади.