АҚШ расмийлари Россия ва Украина 8 августгача ўт очишни тўхтатиш ва тинчлик битимини имзолашни истамоқда. Бу ҳақда АҚШнинг БМТдаги доимий вакили ўринбосари Жон Келли маълумот берди.
Россия ва Украина ўт очишни тўхтатиш ва мустаҳкам тинчлик ўрнатиш бўйича келишиб олиши керак. Битим тузмоқ вақти келди. Президент Трамп бу 8 августгача амалга оширилиши кераклигини аниқ айтди. АҚШ тинчликни таъминлаш учун қўшимча чоралар кўришга тайёр, деди Келли.
Трамп 29 июль куни Москвага урушни якунлаш учун ўн кун муҳлат берган эди. Бу муддат 8 августда якунланади. Аввалроқ 14 июль куни у 50 кунлик муддат ҳақида гапирган, бироқ Россиянинг ҳужумларни кучайтираётгани ва Украинанинг тинч аҳолисини нишонга олаётгани боис, Трамп ўз позициясини кескинлаштирган.
Агар талаблар бажарилмаса, АҚШ президенти Россияга ҳамда у билан савдо алоқаларини давом эттираётган давлатларга қарши 100 фоизлик бож тарифларини жорий этишини айтган. Бу бўйича илк санкциялар пакетини республикачи сенатор Линдси Грем тайёрлаган. Дастлаб 500 фоизлик божлар кўзда тутилган бўлса-да, кейинчалик у 100 фоизга туширилган.
Кремль бу таҳдидларга жавобан, Россия АҚШ босимига қарамай ҳарбий ҳаракатларни тўхтатмаслигини билдирди. Путиннинг матбуот котиби Дмитрий Песковга кўра, Россиянинг Украинадаги амалиётлари “миллий манфаатларни ҳимоя қилиш” сифатида баҳоланади. У, шунингдек, Россия иқтисодиёти Ғарб санкцияларига нисбатан “иммунитет”га эга эканини таъкидлади.
Россия президенти америкалик ҳамкасбининг ультиматуми фонида оммавий изоҳ бермаган. Бироқ унинг сафдоши — Россия Хавфсизлик кенгаши раиси ўринбосари, собиқ президент Дмитрий Медведев ижтимоий тармоқларда Трамп ва сенатор Грем билан очиқ баҳсга киришган. У АҚШга нисбатан “ядровий апокалипсис” билан таҳдид қилган. Бунга жавобан Трамп уни бундай ҳужумлардан огоҳлантириб, “ўта хавфли ҳудудга қадам қўяётганини” таъкидлаган.
Изоҳ (0)