Хоразм вилояти Урганч шаҳрида автомобилларга мобил ёнилғи қуйиш шохобчасида ёнғин чиқди. Бу ҳақда Фавқулодда вазиятлар вазирлиги хабар қилди.
Қайд этилишича, 8 август соат 19:47 да Хоразм вилояти, Урганч шаҳар, Жаннатмакон кўчасида жойлашган автомобилларга мобил ёнилғи қуйиш шохобчаси ҳудудида ёнилғи ташувчи автоцистернадан ёнилғи сақлаш резервуарга бензин тўкиш вақтида ёнғин келиб чиққани тўғрисида ФВБга хабар тушган.
Ўтни ўчириш учун 5 та ёнғин-қутқарув экипажи соат 19:50 да воқеа жойига етиб бориб, ёнғин соат 19:56 да қуршаб олинган ва соат 20:06 да ўчирилган.
Ёнғин оқибатида тан жароҳати олганлар тўғрисида хабар келиб тушмагани айтилди. Ҳозирда ҳодиса сабаби ва зарар миқдори аниқланмоқда.
Аввалроқ 5 август куни Қашқадарё вилоятининг Кўкдала туманида заправка портлагани тўғрисида хабар қилинганди. Бу ушбу тумандаги ёнилғи қуйиш шохобчасида юз берган илк ҳолат бўлмаган. Жорий йилнинг 16 июль куни ҳам ушбу тумандаги газ тўлдириш станцияси ҳудудида ёнилғи сақлаш резервуарида чақнаш ва ундан сўнг ёнғин содир бўлган. Ҳодиса оқибатида 5 киши вафот этган.
Изоҳ (0)