Хитой Қозоғистонда иккита атом электр станцияси (АЭС) қуради. Бу ҳақда мамлакат бош вазирининг биринчи ўринбосари Роман Скляр маълум қилди.
Унинг сўзларига кўра, ҳозирда лойиҳаларнинг техник-иқтисодий асослари ва лойиҳа-смета ҳужжатлари ишлаб чиқилмоқда. Шунинг учун қурилишнинг аниқ нархи ҳали номаълум.
Ҳукуматлараро келишув ва ҳамкорлик шакли бўйича барча масалалар келишиш босқичида, кейинчалик улар парламентда тасдиқланади, деди Қозоғистон ҳукумати раҳбарининг биринчи ўринбосари.
Ҳозирда мутахассислар станциялар жойлашадиган ҳудудларни ўрганмоқда. Бунда сув таъминоти ва электр энергияси манбаларининг мавжудлиги муҳим мезон сифатида кўрилмоқда.
Лойиҳани амалга оширувчи Хитой компаниясининг номи расман ошкор этилмаган. Бироқ бу ишларни илгари “Росатом” билан биргаликда консорсиумларга раҳбарлик қилган China National Nuclear Corporation (CNNC) бажариши мумкин.
Қозоғистонда биринчи АЭС қуриш тўғрисидаги қарор 2024 йилги референдумда қабул қилинган эди. 2025 йилнинг июнь ойида Атом энергияси агентлиги учта станциянинг биринчисини “Росатом” қуриши ҳақида хабар берган.
Объектни Олмаота вилоятида (Жамбил туманининг Балхаш кўли қирғоғидаги Улкен посёлкасида) жойлаштириш мўлжалланган. Уни 2035-2036 йилларда ишга тушириш режалаштирилган. 2035 йилга бориб Қозоғистон ҳукумати 2,4 гигаватт ядровий қувватни таъминлашни мақсад қилган.
Дунёдаги энг йирик уран ишлаб чиқарувчиси бўлган Қозоғистон ҳозирда ўз атом электр станцияларига эга эмас ва ядровий цикл маҳсулотларини истеъмол қилмайди. Бироқ унинг конларидаги уран захиралари дунё захираларининг тахминан 15 фоизини ташкил этиб, фақат Австралиядан кейин иккинчи ўринда туради.
Изоҳ (0)