19 август куни эрталаб Финляндия парламентининг 30 ёшли депутати Эемели Пелтонен Эдускунта биносида жонсиз ҳолда топилди. Бу ҳақда МTV Uutiset хабар бермоқда.
Маълум қилинишича, ҳодиса ҳақидаги хабар фавқулодда хизматларга соат 11:06 да етиб келган. Газета манбалари депутатнинг ўз жонига қасд қилганини таъкидламоқда. Парламент хавфсизлик хизмати раҳбари Ааро Тоивонен Yle’га берган изоҳида бу маълумотларни инкор этмаган.
Полиция ўлим ҳолатини текширишни бошлаган. Ҳуқуқ-тартибот идоралари ходимлари жиноят аломатлари аниқланмаганини қайд этган. Воқеа жойида бир нечта полиция патруллари ва тиббиёт ходимлари фаолият юритмоқда. Вазиятлар маркази Карҳу махсус бўлинмаси парламентга жалб қилинмаганини аниқлаштирган.
Коалиция партияси фракцияси раиси Жукка Копранинг таъкидлашича, у фожиа ҳақида ёзги вазирлар йиғилишида журналистлардан хабар топган.
Унинг айтишича, ҳалок бўлган депутатнинг қайси партияга мансублигини билмайди. Сиёсатчи содир бўлган воқеани қайғули ва жиддий ҳодиса деб баҳолаган.
Финляндия парламенти бинодан жасади топилган депутат Эемели Пелтоненнинг вафот этганини тасдиқлаган.
“Парламент биносида 19 август куни эрталаб вафот этган шахс Уусимаа сайлов округидан биринчи чақириқ парламент депутати Эемели Пелтонен экани аниқланди”, дейилади хабарда.
Парламентда ҳозир ёзги таътил давом этмоқда. Кузги сессия 2 сентябрга белгиланган.
Изоҳ (0)