Фарғона вилоятининг Қўқон шаҳрида алимент тўламай юрган аёл суд жараёнида қарзларини тўлаб берди. Бу ҳақда “Миллар” дастурида хабар қилинди.
Маълум бўлишича, қўқонлик аёл аввалдан тез-тез чет элга чиқиб, ишлаб келиб юргани сабабли унинг турмуш ўртоғи бундан норози бўлиб, аёли билан ажрашишга қарор қилади. Уларнинг 3 нафар фарзанди ота қарамоғига топширилгач, онага алимент тўлаш белгиланган.
Аёл эса турли баҳоналар билан бир йил давомида алимент қарздорликларини сўндирмай, қочиб юрган. Шунга кўра, суд ҳукми асосида алимент тўловларини ундириш учун ижро ҳаракатлари бошланган.
Қарздор онага давлат ижрочиси томонидан маъмурий баённома расмийлаштирилиб, қонуний кўриб чиқилиши учун Қўқон шаҳар судига тақдим қилинган. Суд жараёнида аёл 3 нафар вояга етмаган фарзандлари учун 85 миллион сўм қарздорликни тўлаб бергани сабабли Маъмурий жавобгарлик тўғрисидаги кодекснинг 271-моддасига асосан ушбу иш суд тартибида тугатилган.
Бухорода ота фарзандларига 128 миллион сўм алиментни тўламай юргани тўғрисида хабар қилинганди.
Изоҳ (0)