Камола Маҳмудова 48 ёшида вафот этди

Европа тикланиш ва тараққиёт банкининг Озарбайжондаги ваколатхонасининг собиқ раҳбари, ўзбекистонлик Камола Маҳмудова 48 ёшида Лондонда вафот этди.

Камола Маҳмудова 1976 йил Тошкентда туғилган. У Khan Academy, “Эзгу амал”, “Яшил Бухоро” каби бир қатор таълим, ижтимоий ва хайрия лойиҳаларининг ташаббускори ва фаол иштирокчиси эди. У 25 йилдан буён Европа тикланиш ва тараққиёт банкида фаолият кўрсатиб келаётганди.

Президентнинг собиқ давлат маслаҳатчиси, ташқи ишлар вазирининг биринчи ўринбосари ва ўринбосари, Ўзбекистоннинг Бельгия, Буюк Британия ва бошқа мамлакатлардаги элчиси, профессор Алишер Файзуллаевнинг ёзишича, Камола Маҳмудова узоқ давом этган хасталикдан сўнг вафот этди.

“У халқаро Молия ташкилотининг (ЕТТБ) хориждаги ваколатхонасини (Озарбайжондаги) бошқарган ўзбекистонлик биринчи шахс бўлди. Лондонда Ўзбекистон маданияти кунларини уюштирган асосий шахслардан бири эди. Лондонда яшаб, у Ўзбекистонда ҳам ажойиб лойиҳалар яратди, атроф-муҳит, таълим, ижтимоий ва бошқа соҳага тегишли дастурлар учун анча маблағлар йиғди ва ҳар бир ишда самарали натижалар кўрсатди”, дейди Алишер Файзуллаев. 

“Бу Ўзбекистон учун катта йўқотиш. Ўзининг қисқа умрида у ҳатто Лондон ва Озарбайжонда яшаб туриб ҳам ватан учун жуда кўп иш қилди”, деб ёзди Миллий масс-медиани қўллаб-қувватлаш ва ривожлантириш жамоат фонди директори Жаҳонгир Азимов.

Шавкат Мирзиёев 2020 йилда Камола Маҳмудовани хизматлари учун “Дўстлик” ордени билан тақдирлаган.

“Ўзбекистонлик” фильмининг хорижда муваффақият қозонган ўзбеклар ҳақидаги эпизодларидан бири Камола Маҳмудовага бағишланган.