Россия президенти Владимир Путин 1994 йилдаёқ Қрим, Шарқий Украина ва Шимолий Қозоғистонга ҳудудий даъволарини билдирган. Бу ҳақда Германия Ташқи ишлар вазирлиги архив ҳужжатларига таяниб, Der Spiegel хабар берди.
Бу маълумотлар Германиядаги Замонавий тарих институти (Institut für Zeitgeschichte) томонидан чоп этилган “Германия федератив республикаси ташқи сиёсати ҳужжатлари” тўпламининг янги жилдида келтирилган. Янги нашр 1994 йилнинг биринчи ярмига бағишланган. Der Spiegel журналистлари у билан танишиб чиққан.
Ҳужжатлардан бирида ГФРнинг Санкт-Петербургдаги бош консули қайдлари келтириб ўтилган. Дипломат 1994 йил 14 январдаги Путиннинг “таъкид” билан айтган баёнотларини ёдга олган.
Унинг айтишича, Қрим, Шарқий Украина ва Шимолий Қозоғистон — камида шу ҳудудлар — ҳеч қачон Россия учун хориж бўлмаган, улар доим Россиянинг бир қисми бўлган. Ҳеч бир россияликка бу ҳудудлар қандай қилиб бошқа давлат таркибида қолаётганини тушунтириб бўлмайди, дея Путиннинг сўзларини германиялик дипломат келтирган.
Путин бу россияликлар учун миллий масала бўлиб, немислар англашда қийналиши мумкинлигини айтган. Шунингдек, агар русларнинг Украина ва Қозоғистондаги иқтисодий ҳамда ижтимоий аҳволи қониқарли бўлса, “муаммо йўқ” деб таъкидлаган.
“Ғарб мамлакатларини “агар Россия манфаатларини оқилона ҳимоя қилишни Россия империализмининг қайта тикланиши деб атаса, бу ҳақда етарли маълумотга эга эмаслар”, дея Путин сўзларини немис дипломати келтириб ўтган.
Изоҳ (0)