Мўғулистон президентининг Ўзбекистонга биринчи давлат ташрифи ҳақли равишда тарихий бўлди. Бу ҳақда Шавкат Мирзиёев Мўғулистон президенти Ухнаагийн Хурельсух билан олий даражадаги музокаралар якунлари бўйича оммавий ахборот воситалари вакиллари учун берган баёнотида айтиб ўтди.
Президент матбуот хизматининг хабар қилишича, етакчилар очиқ ва ишчан муҳитда бўлиб ўтган мулоқотнинг самарали натижаларидан мамнун эканликларини, амалий ҳамкорликнинг барча асосий йўналишлари атрофлича кўриб чиқилганини таъкидлади.
Давлат раҳбари Мўғулистон президентининг икки томонлама муносабатлар тарихидаги биринчи ташрифи Ўзбекистон-Мўғулистон дўстлигини мустаҳкамлаш ва кўп қиррали ҳамкорликни ривожлантиришга бўлган ўзаро интилишнинг тасдиғи бўлганини қайд этди.
“Мўғулистон биз учун Осиё минтақасидаги анъанавий ва ишончли ҳамкордир. Ўзбекистон—Мўғулистон муносабатлари дўстлик, ўзаро ҳурмат ва қўллаб-қувватлаш тамойилларига асосланган бўлиб, конъюнктурага боғлиқ эмас”, – деди Шавкат Мирзиёев.
Қайд этилишича, давлат раҳбарларининг Самарқанд ва Дубайда бўлиб ўтган учрашувларидан сўнг барча даражалардаги алоқалар фаоллашди. Тизимли сиёсий мулоқот ўрнатилди. 24 июнь куни Тошкентда Мўғулистон элчихонаси расман очилади.
Музокаралар чоғида ҳамкорликнинг янги кун тартиби келишиб олинди. Томонлар минтақавий ва халқаро тузилмалар, жумладан, БМТ, ШҲТ ва бошқалар доирасида яқин мулоқотларни ва ўзаро қўллаб-қувватлашни давом эттиришга келишди. Савдо-иқтисодий ҳамкорлик ва саноат кооперациясини кенгайтиришга алоҳида эътибор қаратилди.
Мамлакатлар бир-бирини самарали тўлдириши мумкин бўлган тармоқларда саноат кооперациясининг аниқ йўналишлари ҳам белгиланди.
Минерал ресурсларни қазиб олиш ва қайта ишлаш, Қорақалпоғистон, Наманган вилояти ва бошқа ҳудудларда чорвачилик мажмуаларини, гўштни қайта ишлаш кластерини ташкил қилиш, енгил саноатда жун ва терини чуқур қайта ишлаш, шунингдек, фармацевтика, соғлиқни сақлаш ва бошқа кўплаб соҳалардаги қўшма лойиҳаларни амалга ошириш шулар жумласидан.
“Мўғулистон президентининг Ўзбекистонга биринчи давлат ташрифи ҳақли равишда тарихий бўлди ва кўп қиррали ҳамкорликнинг янги босқичини бошлаб берди. Биргаликдаги катта ишларимизнинг биринчи амалий натижаларини тез фурсатда кўрамиз, деб ишонаман”, — деди Ўзбекистон президенти сўзининг якунида.
Ухнаагийн Хурельсух рафиқаси Лувсандорж Болорцецег ҳамроҳлигида Ўзбекистонга 23 июнь куни ташриф буюрган эди. 24 июнь куни Кўксарой қароргоҳида уларни расмий кутиб олиш маросими бўлиб ўтди. Шавкат Мирзиёев таклифига биноан келган Мўғулистон етакчиси 26 июнгача давлат ташрифи билан Ўзбекистонда бўлади.
Давлат ташрифи доирасида президентларнинг икки мамлакат етакчи компаниялари ва ишбилармон доиралар вакиллари билан учрашуви ҳамда қатор бошқа икки томонлама тадбирлар ўтказилиши режалаштирилган.
Мўғулистон президенти Хива шаҳрига ҳам ташриф буюриб, ўзбек халқининг бой маданий-тарихий мероси билан танишади.
Изоҳ (0)