Mo‘g‘uliston prezidentining O‘zbekistonga birinchi davlat tashrifi haqli ravishda tarixiy bo‘ldi. Bu haqda Shavkat Mirziyoyev Mo‘g‘uliston prezidenti Uxnaagiyn Xurelsux bilan oliy darajadagi muzokaralar yakunlari bo‘yicha ommaviy axborot vositalari vakillari uchun bergan bayonotida aytib o‘tdi.
Prezident matbuot xizmatining xabar qilishicha, yetakchilar ochiq va ishchan muhitda bo‘lib o‘tgan muloqotning samarali natijalaridan mamnun ekanliklarini, amaliy hamkorlikning barcha asosiy yo‘nalishlari atroflicha ko‘rib chiqilganini ta’kidladi.
Davlat rahbari Mo‘g‘uliston prezidentining ikki tomonlama munosabatlar tarixidagi birinchi tashrifi O‘zbekiston-Mo‘g‘uliston do‘stligini mustahkamlash va ko‘p qirrali hamkorlikni rivojlantirishga bo‘lgan o‘zaro intilishning tasdig‘i bo‘lganini qayd etdi.
“Mo‘g‘uliston biz uchun Osiyo mintaqasidagi an’anaviy va ishonchli hamkordir. O‘zbekiston—Mo‘g‘uliston munosabatlari do‘stlik, o‘zaro hurmat va qo‘llab-quvvatlash tamoyillariga asoslangan bo‘lib, kon’yunkturaga bog‘liq emas”, – dedi Shavkat Mirziyoyev.
Qayd etilishicha, davlat rahbarlarining Samarqand va Dubayda bo‘lib o‘tgan uchrashuvlaridan so‘ng barcha darajalardagi aloqalar faollashdi. Tizimli siyosiy muloqot o‘rnatildi. 24-iyun kuni Toshkentda Mo‘g‘uliston elchixonasi rasman ochiladi.
Muzokaralar chog‘ida hamkorlikning yangi kun tartibi kelishib olindi. Tomonlar mintaqaviy va xalqaro tuzilmalar, jumladan, BMT, SHHT va boshqalar doirasida yaqin muloqotlarni va o‘zaro qo‘llab-quvvatlashni davom ettirishga kelishdi. Savdo-iqtisodiy hamkorlik va sanoat kooperatsiyasini kengaytirishga alohida e’tibor qaratildi.
Mamlakatlar bir-birini samarali to‘ldirishi mumkin bo‘lgan tarmoqlarda sanoat kooperatsiyasining aniq yo‘nalishlari ham belgilandi.
Mineral resurslarni qazib olish va qayta ishlash, Qoraqalpog‘iston, Namangan viloyati va boshqa hududlarda chorvachilik majmualarini, go‘shtni qayta ishlash klasterini tashkil qilish, yengil sanoatda jun va terini chuqur qayta ishlash, shuningdek, farmatsevtika, sog‘liqni saqlash va boshqa ko‘plab sohalardagi qo‘shma loyihalarni amalga oshirish shular jumlasidan.
“Mo‘g‘uliston prezidentining O‘zbekistonga birinchi davlat tashrifi haqli ravishda tarixiy bo‘ldi va ko‘p qirrali hamkorlikning yangi bosqichini boshlab berdi. Birgalikdagi katta ishlarimizning birinchi amaliy natijalarini tez fursatda ko‘ramiz, deb ishonaman”, — dedi O‘zbekiston prezidenti so‘zining yakunida.
Uxnaagiyn Xurelsux rafiqasi Luvsandorj Bolorsetseg hamrohligida O‘zbekistonga 23-iyun kuni tashrif buyurgan edi. 24-iyun kuni Ko‘ksaroy qarorgohida ularni rasmiy kutib olish marosimi bo‘lib o‘tdi. Shavkat Mirziyoyev taklifiga binoan kelgan Mo‘g‘uliston yetakchisi 26-iyungacha davlat tashrifi bilan O‘zbekistonda bo‘ladi.
Davlat tashrifi doirasida prezidentlarning ikki mamlakat yetakchi kompaniyalari va ishbilarmon doiralar vakillari bilan uchrashuvi hamda qator boshqa ikki tomonlama tadbirlar o‘tkazilishi rejalashtirilgan.
Mo‘g‘uliston prezidenti Xiva shahriga ham tashrif buyurib, o‘zbek xalqining boy madaniy-tarixiy merosi bilan tanishadi.
Izoh (0)