Халқ банки: коррупцион ҳолатлар бўйича мурожаатлар ўтган йилдагига нисбатан 40 фоизга камайди

Халқ банки бош офисида “9 декабрь – Бутунжаҳон коррупцияга қарши курашиш куни” муносабати билан “Очиқ эшиклар куни” тадбири ўтказилди.

Учрашувда банк раҳбарияти, оммавий ахборот воситалари, прокуратура, Антикоррупция агентлиги вакиллари ва талабалар иштирок этди.

Ўзаро мулоқотда Халқ банки фаолиятида очиқлик ва шаффофликни таъминлаш, тизимда коррупцияга қарши курашиш бўйича бажарилаётган ишлар тўғрисида сўз борди.

Жорий йилнинг 11 ойи давомида Халқ банки тизимида учраётган коррупцион ҳолатлар бўйича юридик ва жисмоний шахслардан 503 та мурожаат йўлланган. Бу ўтган йилгига нисбатан 40 фоизга кам, дегани. Январь–ноябрь ойларида банк томонидан аниқланган коррупцион ҳолатлар туфайли банкнинг 282 нафар ходимига тегишли чоралар кўрилган.

Халқ банки марказий аппаратида Ички назорат ва комплаенс департаменти ташкил этилган. Департамент ходимлари кунлик банк операцияларини тўлиқ назоратдан ўтказиб, аниқланган ҳар қандай қонун бузилиш ҳолатлари бўйича белгиланган тартибда ҳуқуқни муҳофаза қилувчи органларга хабар берилишини таъминлайди.

Тизимда коррупцион ҳолатлар аниқланса, банкнинг марказий аппаратига зудлик билан хабар беришни таъминлаш учун “Тезкор хабар” мобил иловаси ишлаб чиқилган. Иловадан йўлланган мурожаатлар инсон омилисиз автоматик равишда қабул қилиниб, белгиланган тартибда кўриб чиқилади ва аниқланган ҳолатлар юзасидан чоралар кўриб борилади. Банкка илова орқали 2023 йилнинг 11 ойи давомида 100га яқин мурожаат келиб тушди. Мазкур мурожаатлар ўрганилиб, тегишли ҳолатлар юзасидан ҳуқуқни муҳофаза қилувчи органларга хабар берилган.

Мулоқотда Халқ банки бошқарув раисининг ўринбосари Фаррух Рўзиев коррупцияга қарши курашиш бўйича ходимлар малакаси ошириб борилаётганини айтди.

“Жорий йилнинг ўтган даврида Ички назорат ва комплаенс департаментининг 154 нафар ходими Бош прокуратура академиясида малака оширди. Бундан ташқари, департаментнинг уч нафар ходими Чехияда, 156 нафар ходими Тошкент Молия институтида малака оширди. Яъни коррупцияга қарши курашиш йўналишида ходимларимиз малакаси мунтазам равишда ошириб борилмоқда”,—деди раис ўринбосари.

Халқ банки ва “CEРТ ACADEMY GROUP” компанияси ўртасида тузилган шартномага мувофиқ, банкнинг 100 нафар ходими халқаро сертификат олиш учун “ISO 37001:2016 бўйича коррупцияга қарши курашиш менежмент тизими ички аудитори/менежери” мавзусида ўқитилди. 

Тизимда коррупцияга қарши курашиш борасида ички аудит текширишлари ҳам ўтказиб турилади. Бу биринчи навбатда, риск даражаси юқори бўлган йўналишлар фаолиятининг назоратга олиниши билан аҳамиятлидир.

Халқ банки томонидан кредит ажратиш жараёнида инсон омилини камайтириш ҳамда мижозларга қулайлик яратиш мақсадида “хазна” мобил иловаси ишлаб чиқилган. Натижада 11 ой ичида ушбу илова орқали 46 минг 644 нафар мижозга инсон омилисиз 503,7 миллиард сўм кредит ажратилган. Шу билан бирга, 149 минг 399 нафар фуқаролардан 1 триллион сўм омонат жалб қилинган.

Учрашув давомида банк раҳбарияти ва бошқа иштирокчилар журналистларни қизиқтирган саволларга жавоб қайтарди.

Реклама ҳуқуқи асосида.