“Миллий такланиш” демократик партияси раиси Алишер Қодиров Оталар кунини жиддий сиёсий-ижтимоий кун сифатида оммалаштиришни таклиф этди.
“Оталар тоғ бўларди. Бугун зўравон, номуссиз, алиментдан қочиб юрадиган, хотинбоз ва ҳоказо… Нафақат оилада, бутун жамиятда эркакни, яъни амалдаги ёки бўлажак оталар оҳорини тўкиб, номини оёқости қилиб юбормаяпмизми? Бунинг оқибати нима бўлади?” — дейди депутат.
Алишер Қодировнинг сўзларига кўра, бугунги оила бузилишларининг асосий сабаби ёшлар биргаликда сабр билан ўтишлари керак бўлган муаммолар, лекин томонлар бир-бирига ичончини йўқотмоқда. Мувозанатли муроса, оқибати ҳаловот ва маърифатли фарзандлар бўлган миллий оила маданияти, оталарни рад этаётган, эркак-аёл муносабатларида инқирозга тушиб қолган маданиятлар таъсирида қолиб кетаётгандек.
Боғча ва мактабни эркак тарбиячи ва ўқитувчилар ташлаб кетганига анча бўлди. Сўнгги йилларда эркаклар оиладан ҳам сиқиб чиқарилаётгандек.
“Миллат тақдири қуриладиган бу масканлар рад этилаётган оталикнинг аччиқ мевалари — асабий аёлларнинг эътирозлари билан бўғилмаяптими? Нега оналар, тарбиячи ва ўқитувчи аёллар бу қадар асабий?” — дейди Алишер Қодиров.
Унинг билдиришича, аҳмоқ ҳамма миллатда топилади, иккита зўравон, тарбиясизни бош саҳнага чиқариб, ўзбек эркаклари ҳаммаси зўравон, аёлини хор қилади деган қарашларни ёшларга сингдирилиши оқибати яхши бўлмайди.
“Ота, эркак — жамият шаъни шавкатини ҳимоячиси! Мукаррам ва ҳикматли оналар бу ҳимоячиларни тарбияловчилардир!”, — деб таъкидлади депутат.
“Миллий такланиш” демократик партияси раисининг маълум қилишича, сайлов дастурида фарзанд кўрган аёлларга тарбия тренингларида иштирок этиш шарти билан 3 йилгача ҳақ тўланадиган оналик таътили бериш таклифи устида ишланмоқда.
“Агар оналар шавкатли фарзандлар учун ҳаловатидан кечмаса, отасини танимайдиган фарзандлар нафақат онаси, балки бутун жамиятни нафсига қурбон қилади”, — деди Алишер Қодиров.
Депутат оила муносабатлари жиддий тадқиқ қилиниши кераклигини, бу миллий тараққиётни таъминлашга хизмат қиладиган муҳим хулосаларга олиб келишини қайд этди.
Маълумот учун, айни пайтда дунёнинг 30 дан ортиқ давлатларида Оталар куни турли саналарда, хусусан, Қозоғистонда июнь ойининг учинчи якшанбасида, Россияда октябрь ойининг учинчи якшанбасида нишонланади.
Изоҳ (0)