Канаданинг Алберта провинцияси ҳукумати келгуси йили мустақиллик референдумини ўтказиш мумкинлигини эълон қилди. Бу ҳақда Тhе Economic Times нашри хабар бермоқда.
Провинция бош вазири Даниэль Смитнинг айтишича, агар петицияга етарли миқдорда имзо тўпланса, мустақиллик масаласи овозга қўйилиши мумкин. У шахсан мустақиллик ғоясини қўллаб-қувватламаслигини таъкидласа-да, унинг баёноти провинция айирмачилик кайфияти кучайиши фонида янграган.
Маълум қилинишича, вазиятни Канаданинг АҚШга қўшилиши мумкинлиги ҳақида бир неча бор айтган Дональд Трамп тимсолидаги ташқи омил янада мураккаблаштирмоқда. Нефть захираларига бой Алберта тарихан федерал марказга қарши энергетика сиёсати бўйича зиддиятга киришиб келган. Ҳуду нефть қазиб олишни ривожлантириш тарафдори, Канада ҳукумати эса “яшил” энергетикага эътибор қаратмоқда.
Таъкидланишича, мутахассислар Смитнинг ташаббусини мустақилликка қаратилган ҳақиқий қадам эмас, балки Оттавага босим ўтказиш воситаси сифатида баҳолашмоқда. Бундай уринишлар 2021 йилда ҳам бўлган, аммо ўшанда масала ривожланмаган эди. Бироқ, бу сафар вазият бир неча омиллар туфайли ўзгариши мумкин. Масалан, ажралишни ёқловчи Алберта Республикачилар партиясининг кучайиши, яқинда бўлиб ўтган парламент сайловларида консерваторларнинг мағлубияти ва Трампнинг Канада ички ишларига аралашиш эҳтимоли.
Социологик маълумотларга кўра, Алберта аҳолисининг атиги 30 фоизга яқини мустақиллик ғоясини қўллаб-қувватламоқда. Шу билан бирга, Канада сепаратизмининг анъанавий маркази ҳисобланган Квебек позициясида ўзгаришлар кузатилмоқда, у ердаги ҳокимият Албертанинг энергетика лойиҳаларига қизиқиш билдира бошлаган.
Трамп Канада Қўшма Штатлар таркибига кириши кераклигини бир неча бор таъкидлаган. Хусусан, у Канада АҚШнинг 51-штати сифатида “анча яхшироқ” бўлишини айтган.
Шунингдек, сиёсатчи унинг мамлакати Канада туфайли ҳар йили 200 миллиард доллар йўқотаётганини ва бунинг давом этишига йўл қўймаслигини таъкидлаган. Бундан ташқари, Трамп Канаданинг АҚШ таркибига кириши ҳақида фикр билдирганида, канадаликлар учун солиқлар ва мудофаа соҳасида сезиларли тежамкорлик афзаллик бўлиши мумкинлигини айтган.
Изоҳ (0)