800 дан ортиқ ҳуқуқшунос, академик ва собиқ судья Буюк Британияни Исроил ҳукумати ва вазирларига қарши санкциялар жорий этишга, Ғазода геноцидни тўхтатиш ва жазолаш чораларини кўришга чақирди. Бу ҳақда Al Jazeera хабар берди.
26 май куни Буюк Британия бош вазири Кир Стармерга йўлланган очиқ мактубда Ғазода геноцид содир этилаётганлиги ёки унинг жиддий хавфи мавжудлиги, шунингдек, ҳарбий ва инсониятга қарши жиноятлар ҳамда халқаро гуманитар ҳуқуқ бузилишлари таъкидланган.
Мактубда Исроилнинг Ғазо секторини бутунлай назоратга олиш ва ҲАМАСни йўқ қилмагунча ҳудудни босиб олиш режалари ҳам тилга олинган. Юқори лавозимли ҳуқуқшунослар томонидан имзоланган мактубда, Буюк Британия, Франция ва Канада раҳбарларининг Ғазодаги вазият бўйича баёноти эътироф этилиб, ҳукуматларнинг чоралар кўришга тайёрлиги олқишланган.
Шунингдек, Британия ҳукумати халқаро ҳуқуқий мажбуриятларга риоя қилишга, Ғазода ўт очишни дарҳол тўхтатишга ва фаластинликларга ёрдамни тўсиқсиз тиклашга чақирилган. Ноқонуний ҳаракатларда гумон қилинган Исроил расмийларига санкциялар, савдо алоқаларини кўриб чиқиш, савдо санкциялари жорий этиш ва Британия–Исроил ҳамкорлигини чуқурлаштириш режасини тўхтатиш сўралган.
Мактубда, шунингдек, Британиядан Халқаро жиноий суд (ХЖС) томонидан чиқарилган Исроилга қарши ҳибсга олиш ордерларини бажариш мажбуриятини тасдиқлаш талаб қилинган. ХЖС бош вазир Биньямин Нетаньяху ва собиқ мудофаа вазири Йоав Галлантни Ғазодаги ҳарбий ва инсониятга қарши жиноятлари учун ҳибсга олишга ордер берган, мамлакат эса геноцидда айбланган.
Маълумот учун, Буюк Британия яқинда Исроил билан янги савдо битими бўйича музокараларни тўхтатган. 2024 йилги очиқ хатда эса Буюк Британия Исроилни қуроллантириш орқали халқаро ҳуқуқни бузаётгани танқид қилинган.
Изоҳ (0)