ДХХ ходимлари томонидан Тошкент ва Қўқон шаҳарларида ҳаж зиёратига юбориш билан боғлиқ ноқонуний ҳолатлар аниқланди.
Хусусан, Тошкент шаҳрининг Чилонзор туманида яшовчи 41 ёшли шахс Шайхонтоҳур туманида истиқомат қилувчи фуқарони ишончига кириб, танишлари ёрдамида унга Саудия Арабистонига ҳаж сафарига бориши учун зарур бўладиган виза ҳужжатларини тайёрлаб бериш ва зиёратга юбориш эвазига 8,5 минг доллар олган вақтида ашёвий далиллар билан ушланган.
Бошқа ҳолатда эса пойтахтда фаолият юритувчи сайёҳлик фирмаси ходими Шайхонтоҳур туманида яшовчи фуқарони сохта ҳужжатлар орқали ҳаж зиёратига юбориш эвазига 5,5 минг доллар олган вақтида ушланган.
Яна бир сайёҳлик фирмаси бошқарувчиси ва унинг ходими ҳам Яшнобод туманида яшовчи фуқаронинг ишончини суиистеъмол қилиб, жорий “Ҳаж—2024” мавсумида Саудия подшоҳлигига муборак сафарга юбориш эвазига 8,5 минг доллар талаб қилиб, 4 минг долларини олган вақтида қўлга тушган.
Қўқон шаҳрида фаолият юритувчи сайёҳлик фирмасининг иш бошқарувчиси икки нафар фуқарони ҳаж амалларини бажариши учун Саудия Арабистонига юбориш эвазига 12 минг доллари талаб қилиб, 10 минг АҚШ доллари олган вақтида ушланган.
Қўқон шаҳрида кузатилган яна бир ҳолатда, бошқа сайёҳлик фирмаси ходими маҳаллий фуқарони ҳожи мақомига эга бўлиши учун ҳаж зиёратига юбориш эвазига 6 минг доллар талаб қилиб, 3 минг доллар олган вақтида қўлга олинди.
Ҳозирда барча ҳолатлар юзасидан мазкур шахсларга нисбатан жиноят ишлари қўзғатилиб, дастлабки тергов ҳаракатлари олиб борилмоқда.
Ўзбекистонда ҳаж мавсуми 2024 йил 23 майдан бошланди. Республикадан Саудия Арабистонига 7 июнга қадар ҳар куни авиақатновлар амалга оширилади. Ўзбекистон фуқаролари учун умумий ҳаж квотаси 15 минг нафар этиб белгиланди.
Изоҳ (0)