Тожикистон ва Афғонистонда кучли ёғин ортидан Амударёда сув сатҳининг кўтарилиши кутилмоқда. Бу ҳақда Туркманистон Гидрометеорология хизмати ахборотига таяниб иқлимшунос Эркин Абдулаҳатов хабар берди.
Гидрометеорология хизмати ахборотига кўра, Амударёнинг асосий кузатув пункти “Керки” гидропостида 21—23 май кунлари сув сатҳи нолдан 290-310 сантиметргача, “Туркманобод”да 22—25 май кунлари 270-300 сантиметргача, “Дарғон ота”да 480-500 сантиметргача кўтарилиши кутилмоқда.
“Метеожурнал” 18 ва 23 майда олинган сунъий йўлдош тасвирларини солиштирган. Бунда ҳам Амударёда сув сатҳининг кўтарилиши 18 май кунига нисбатан 23 майда сезиларли кўпайиб кетганини кўриш мумкин.
Афтидан, Амударёда сув тошқинларига Тожикистон ва Афғонистонда кучли ёмғир сабаб бўлмоқда. 16—18 май кунлари Тожикистоннинг бир неча минтақаларида жуда кучли ёмғир ёғди, об-ҳаво станцияларидан олинган маълумотларга кўра, жойларда кунига 50 мм ва ундан ортиқ ёғингарчилик кузатилган.
Изоҳ (0)