2023 йилда Каспий денгизи сатҳи пасайишда давом этиб, 2022 йилдаги даражага нисбатан 26 сантиметрга пасайди. Бу ҳақда Каспий денгизи гидрометеорологиясини мувофиқлаштириш қўмитаси маълумотларига таяниб, “Метеожурнал” хабар берди.
Денгиз сатҳи 2021 йилда 20 сантиметрга, 2022 йилда эса 27 сантиметрга пасайган. Сунъий йўлдош тасвирларида, масалан, Уфра яриморолининг жанубий учидаги қирғоқ чизиғи йил давомида деярли 700 метрга силжиганини кўриш мумкин.
Красноводск кўрфазининг шимоли-шарқида эса қирғоқ чизиғи йил давомида уч километрдан кўпроққа силжиган. Каспий денгизининг бундай кескин саёзлашишига Волга дарёси оқими камайгани сабаб экани айтилади.
“Бироқ умумий саёзлик даври ХХ асрнинг охиридан бери давом этмоқда ва Волга оқимига боғлиқ эмас. Ҳозир Каспий денгизи даражаси бутун кузатувлар тарихидаги минимал даражага яқин”, — дейилади хабарда.
Изоҳ (0)