Шавкат Мирзиёев Баҳоуддин Нақшбанд мақбарасини зиёрат қилди (фото)

Шавкат Мирзиёев 31 май куни Бухоро вилоятига ташрифини анъанага биноан Баҳоуддин Нақшбанд мақбарасини зиёрат қилишдан бошлади.

Президент матбуот хизматининг хабар қилишича, давлат раҳбари ташаббуси билан мажмуа янада обод қилиниб, тарихий аслият тикланмоқда. Зиёрат чоғида ушбу ишлар кўздан кечирилди.

“Юз йил вайрон бўлиб ётган бу дарвозани тиклаганимиз — ўзликни англаш, тарихга ҳурматимиз ифодаси”, — деди президент Тоқи миёна дарвозасидан борувчи тарихий йўлак тиклангани ҳақида.

Тоқи миёна дарвозасининг икки ёни боғга айлантирилган. Музей ва таҳоратхона барпо этилган. Йўқолиб бораётган Дониёлбий мадрасаси тикланмоқда.

Президент бу ердаги ҳар бир обидага, хонлар дахмаларига битиклар ёзиб қўйиш кераклигини айтди.

“Зиёратга келганлар қадамма-қадам тарихни ўрганиб, маънавий руҳ олиб ўтсин”, — деди Шавкат Мирзиёев.

Олимлар билан суҳбатда Баҳоуддин Нақшбанд меросини чуқур ўрганиш ҳақида фикр алмашилди. Чет давлатлардан манбаларни олиб келиш, илмий изланишларни қўллаб-қувватлаш, музейни Имом Бухорий мажмуасидагидек мазмунан бойитиш зарурлиги таъкидланди.

Шунингдек, зиёратчилар, жумладан, хорижий туристлар учун қулайликларни кенгайтириш, қишга ҳам, ёзга ҳам мос шароитлар яратиш бўйича кўрсатмалар берди.

Мутасаддиларга шуларни қамраб олган ҳолда, олимларнинг таклифлари асосида қарор ишлаб чиқиш топширилди.