Рамзан Қодиров 26 май куни Ўзбекистонга амалий ташриф билан келди.
У 27 май куни икки давлат раҳбарлари — Шавкат Мирзиёев ҳамда Владимир Путин иштирокида бўлиб ўтадиган Ўзбекистон ва Россия ҳудудлари кенгашининг биринчи йиғилишида қатнашиш учун Чеченистон делегацияси бошчилигида Тошкентга келди.
Рамзан Қодиров Ўзбекистонга етиб келганида бош вазир Абдулла Арипов уни самимий ва меҳмондўстлик билан кутиб олганини таъкидлади.
“Учрашувда у Владимир Путин ва Шавкат Мирзиёевнинг сиёсий иродаси туфайли эришилган шериклик муносабатларининг стратегик моҳиятини қайд этди. Абдулла Нигматович, шунингдек, халқларимиз ўртасида азалдан дўстона муносабатлар ўрнатилгани ва уни сақлаб қолиш зарурлигини таъкидлади”, — деб ёзган ўзининг Telegram каналида.
Рамзан Қодиров Чеченистоннинг биринчи президенти, Россия қаҳрамони Аҳмад ҳожи Қодиров таҳсил олгани учун чеченлар Ўзбекистонни айниқса илиқ қабул қилишини ҳам қайд этиб ўтди.
У давлат раҳбарлари муносабатларни мустаҳкамлашга интилаётганидан чин дилдан хурсанд эканлигини таъкидлади.
“Ишончим комилки, бизнинг ҳамкорликдаги фаолиятимиз Россия ва Ўзбекистон ўртасидаги минтақавий ҳамкорликни янги босқичга кўтаради ҳамда ўзаро манфаатли алоқаларга хизмат қилади”, — дейди Рамзан Қодиров.
Шавкат Мирзиёевнинг таклифига биноан 26 май куни Россия президенти Владимир Путин давлат ташрифи билан Ўзбекистонга келганди. 27 май куни олий даражадаги музокаралар ўтказилади. Президентлар Ўзбекистон ва Россия ҳудудлари кенгашининг биринчи йиғилишида иштирок этади.
Изоҳ (0)