Малайзия бош вазири Анвар Иброҳим 17 май куни расмий ташриф билан Ўзбекистонга келди.
Уни Тошкент халқаро аэропортида бош вазир Абдулла Арипов ва бошқа расмийлар кутиб олди. Бош вазир матбуот котибининг хабар қилишича, қисқа суҳбатдан сўнг улар ташриф дастури бўйича навбатдаги манзилга жўнаб кетди.
Малайзия бош вазири Анвар Иброҳим Шавкат Мирзиёев таклифига биноан 19 майгача расмий ташриф билан Ўзбекистонда бўлади. Ташрифнинг биринчи кунида Тошкент шаҳрида олий даражадаги тадбирлар ва музокаралар ўтказилиши режалаштирилган.
Саммит кун тартибидан тизимли сиёсий мулоқотни ривожлантириш ва маданий-гуманитар алмашинувни кенгайтириш, савдо, инновациялар, энергетика, нефть-кимё, саноат, электротехника ва электроника, қишлоқ хўжалиги ва иқтисодиётнинг бошқа соҳаларида аниқ кооперация дастурлари ва лойиҳаларини илгари суриш масалалари ўрин олган.
Бундан ташқари, халқаро кун тартибидаги долзарб масалалар юзасидан фикр алмашилади.
Малайзия ҳукумати раҳбари Самарқанд ва Бухоро шаҳарларига ҳам ташриф буюриб, ўзбек халқининг бой маданий-тарихий ва маънавий мероси билан танишади, қўшма бизнес форумида иштирок этади.
Изоҳ (0)