Австралиянинг Квинсленд штати Атертон текислигининг баланд тоғларида фанга илгари номаълум бўлган таёқча шаклидаги ҳашарот тури топилди. 40 сантиметр узунликка эга ва оғирлиги голф коптогидек бўлган бу ҳашарот Австралияда аниқланган энг оғир ҳашарот саналмоқда. Бу ҳақда The Guardian хабар берди.
Олимлар уни acrophylla alta деб номлади. Кашфиёт Жеймс Кук университети олими профессор Ангус Эммотт ва унинг ҳамкори Росс Купланд томонидан амалга оширилган. Эммоттнинг айтишича, бир фойдаланувчининг ижтимоий тармоққа жойлаган расми Росснинг эътиборини тортган. Шу билан олимлар янги турни кашф этган.
Улар бир неча кечани қидирув билан ўтказиб, ниҳоят Millaa Millaa ва Mount Hypipamee ўрмонлари орасида ҳашаротнинг урғочисини топишга муваффақ бўлган. Уни пастга тушириш учун узун таёқдан фойдаланилган.
Ушбу ҳашарот жуда баланд дарахт шохларида яшагани сабабли, олимлар уни илгари илғай олмаган бўлиши мумкин. Бундан ташқари, у совуқ ва нам иқлим шароитида яшайди, бу эса унинг катта тана тузилишини изоҳлаб беради.
Тадқиқот давомида урғочи ҳашарот уй шароитида кузатилган, унга ғамхўрлик қилинган ва тухумлари йиғиб олинган. Эммоттнинг таъкидлашича, таёқча ҳашаротларнинг тухум шакли бошқаларидан анча фарқланади. Келгуси қадам бу турнинг эркак намунасини топиш. Бироқ ҳашаротнинг эркаклари ниҳоятда ингичка ва урғочилардан кўп жиҳатдан фарқ қилгани сабабли бу жараён қийин кечмоқда.
Квинсленд музейи энтомологи Никол Гунтернинг билдиришича, бу топилма Австралия биологик хилма-хиллигини ўрганишда муҳим қадам бўлиб, материкда ҳали илмий номланмаган ҳашаротлар жуда кўп. У Австралиядаги ҳашарот турларининг 70 фоизгача қисми ҳали ўрганилмаган деб ҳисоблайди.
Изоҳ (0)