“Манчестер Юнайтед” Антони учун Саудия Арабистони клубидан қанча талаб қилаётгани маълум бўлди

“Манчестер Юнайтед” вингери Антони Саудия Арабистонининг бир нечта клублари қизиқишлари доирасига тушиб қолди. Бу ҳақда Foot Mercato нашри хабар бермоқда.

Манбага кўра, саудияликлар Антони учун “қизил иблисларга”га расмий таклиф юборган. Таклиф миқдори ошкор этилмаган бўлса-да, манкунианликлар футболчи учун камида 50 миллион фунт стерлинг (тахминан 59 миллион евро) талаб қилмоқда.

Маълумотларга кўра, ҳозирда Саудия Арабистонининг икки клуби — “Ан-Насср” ҳамда “Ал-Ҳилол” Антонини ўз сафига қўшиб олишга ҳаракат қилмоқда. Шу сабабли унинг яна “Манчестер Юнайтед”га қайтиши деярли имконсиз деб баҳоланмоқда.

Бундан ташқари, Антони, Жейдон Санчо, Алехандро Гарначо ва Тейрел Маласия “Манчестер Юнайтед”нинг АҚШдаги мавсумолди йиғинида иштирок этгани йўқ. Жамоанинг бош мураббийи Рубен Аморим бу футболчиларнинг ўйин фалсафасига мос келмаслигини таъкидлаган. Мазкур сабаблар уларнинг манчестерликлар сафини тарк этиш эҳтимоли оширмоқда.

25 ёшли бразилиялик футболчининг “Манчестер Юнайтед” билан тузган амалдаги шартномаси 2027 йил ёзигача мўлжалланган. У ўтган мавсумнинг иккинчи қисмини “Бетис” сафида ижара асосида ўтказди. У испан клуби таркибида жами 17 ўйинда майдонга тушиб, 5 та гол ва 2 та ассистга муаллифлик қилган.