Олий суднинг Иқтисодий ишлар бўйича судлов ҳайъати суд бошланишидан аввал прокурор билан яширин суҳбат қурди. Тахминан 15 дақиқа давом этган суҳбат тарафларни ташқарида қолдирган ҳолда амалга оширилгач, жавобгар ва унинг адвокати бунга эътироз билдирди. Ва судлов ҳайъатидан изоҳ талаб қилди. Бу ҳақда мазкур жараённи кузатган “Дарё” журналисти хабар берди.
“Дарё”да Қашқадарё вилоятининг Нишон туманида фаолият юритувчи фермер МИБнинг туман бўлимидан ҳайдов тракторини 49 кун ноқонуний тарзда ушлаб туриб, фермернинг мавсумда даромад олишига тўсқинлик қилгани учун 355 миллион сўм бой берилган зарарни ундиришга киришгани ҳикоя қилинганди. Мазкур ишни кўриб чиққан қуйи инстанция — Қарши туманлараро иқтисодий суди 2024 йил 5 февралдаги ҳал қилув қарори билан фермер иддаосини ҳақли деб топди ва МИБнинг Нишон туман бўлимидан фермер хўжалиги фойдасига 355 миллион сўм компенсация ундириш керак деган тўхтамга келди. Кейинчалик юқори турувчи инстанция — Қашқадарё вилоят судининг иқтисодий ишлар бўйича судлов ҳайъати апелляция инстанцияси мазкур қарорни бекор қилиб, фермернинг даъво талабини рад этган.
Самарқанд вилоят судининг Иқтисодий ишлар бўйича судлов ҳайъати эса мазкур ишни тафтиш тартибида кўриб чиқиб, 2024 йил 1 августдаги қарори билан Қарши туманлараро иқтисодий судининг 2024 йил 5 февралдаги ҳал қилув қарори ва Қашқадарё вилоят судининг Иқтисодий ишлар бўйича судлов ҳайъати апелляция инстанциясининг 2024 йил 18 апрелдаги қарорини бекор қилди. Фермернинг даъво талабини қисман қаноатлантириб, бой берилган соф фойда 355 миллион сўм эмас, 44 миллион сўм деб топиб, янги қарор қабул қилганди.
Бош прокурор ўринбосари МИБнинг фермерга 44 миллион сўм тўлашини адолатсиз дея баҳолаган шекилли Самарқанд вилоят судининг Иқтисодий ишлар бўйича судлов ҳайъати қарорига протест киритган. Иш шу тариқа Олий судга етиб келган. Олий суднинг Рустамов раислигидаги судья Эргашов ва Тиркашовлардан иборат таркиби эса суд бошланишидан аввал тарафларда суднинг одиллигига, шаффофлигига шубҳа уйғотиб қўйди.
Судьялар олий кенгашининг 2024 йил 15 майдаги 1903-сон қарори билан тасдиқланган “Судьялар одоби кодекси”нинг 2-моддасида судьянинг хулқ-атворига доир умумий талаблар ҳақида сўз бориб, “Судья одоб ва ахлоқнинг умумеътироф этилган қоидаларига амал қилиши, ҳар қандай вазиятда ҳақиқатпарвар бўлиши, суд ҳокимиятининг нуфузини туширадиган ва судьянинг обрў-эътиборига путур етказадиган ёки унинг холислиги, мустақиллиги ва беғаразлигига шубҳа туғдириши мумкин бўлган хатти-ҳаракатлардан ўзини тийиши шарт”, дейилган.
Қашқадарёлик фермер ва унинг адвокати судлов ҳайъатининг хатти-ҳаракатидан норози бўлиб, Олий суд раисига шикоят ҳам ёзди.
Суд мажлисига кириш чоғимизда судлов ҳайъати судьялари олдига биз билан бир жойда суд мажлиси бошланишини кутиб турган Бош прокуратура прокурори Қурбонова (протест асосида судда қатнашувчи) суд бошланмасдан олдин кириб, 15 дақиқа мобайнида бизнинг иш бўйича “муҳим” масалани муҳокама қилди. Бу пайтда судья ёрдамчиси Норқулов биздан ичкарига кирмай туришни прокурор ва судьялар гаплашиб олишини таъкидлаб, суд залига киритмади.
Суд бошлангач, юқоридаги ҳолат бўйича адвокатим судлов ҳайъатидан бунга изоҳ сўради. Судлов ҳайъати судьялари эса бунга бир оғиз ҳам изоҳ беролмади. Бизда бу суҳбат мазкур ишнинг натижасига салбий таъсир қилади деган қўрқув уйғотди. Шубҳа ва гумон қилишимизга сабаб бўлмоқда, дейди фермер бу ҳақда Олий суд раисига шикоят қилар экан.
Судлов ҳайъати мажлисни “Дарё” журналистининг суд мажлисини фото ва видеотасвирга олишга рухсат сўралган илтимосномасини муҳокама қилиш, шунингдек, судда сабабсиз иштирок этмаётган МИБ вакилларининг бу ҳақдаги фикрини билиш учун бошқа кунга қолдирди.
Изоҳ (0)