Судьялар олий кенгаши Самарқандда вафот этган бюти-блогер Г.М.нинг никоҳи бекор қилиниши билан боғлиқ тарқалган хабарларга муносабат билдирди.
Ижтимоий тармоқларда унинг турмуш ўртоғи билан никоҳини бекор қилиш ҳақидаги ариза фуқаролик судида жуда қисқа вақтда кўрилиб, қаноатлантирилганига оид хабарлар тарқалмоқда.
Аниқланишича, Г.М. вафотидан икки ой аввал турмуш ўртоғи биргаликда никоҳдан ажратиш ҳақида судга эмас, балки Самарқанд шаҳар 2-сонли Фуқаролик ҳолати далолатномаларини ёзиш (ФҲДЁ) органига ариза билан мурожаат қилган. Ариза юзасидан тарафлар 2025 йилнинг 9 январь куни мазкур органга таклиф қилинган.
Фуқаролик ишлари бўйича судларга Г.М. ёки унинг турмуш ўртоғи томонидан никоҳдан ажратиш ёки бошқа оилавий низолар бўйича даъво аризалар келиб тушмаган.
“Ижтимоий тармоқлардаги гўёки “суд саноқли кунларда никоҳни бекор қилди” мазмунидаги хабарлар ҳақиқатга тўғри келмайди”, дейилади муносабатда.
Самарқандлик бюти-блогер Г.М. 11 декабрь куни вафот этганди. “Тунда 8-қаватдан ўзини ташлаган, дейишяпти. Сўнгги вақтларда қайнонаси чиқиштирмаётгани, эри кун бермаётгани, кунора уруш-жанжал бўлаётгани ҳақида гапирган экан…”, деб ёзган эди унинг ўлими ҳақида блогер Ақида Ҳанум Facebook’да.
Ҳолат юзасидан прокуратура томонидан терговга қадар текшириш ҳаракатлари олиб борилмоқда. Марҳуманинг ўлими юзасидан суд-тиббиёт экспертизаси тайинланган. Текшириш давомида ижтимоий тармоқларда билдирилаётган важлар ҳам ўрганиб чиқилади.
Изоҳ (0)