Ижтимоий тармоқларда Бекободнинг “Металлург” клуби Суперлигада иштирок этмаслиги муҳокама қилинмоқда. Ўзбекистон Профессионал футбол лигаси ҳолат бўйича баёнот берди.
Маълум қилинишича, жамоанинг Суперлигада иштирок этиши ёки этмаслиги масаласида клуб ёки унинг таъсисчиси ЎзПФЛга хабар бермаган. ПФЛ “Металлург” 7 нафар асосий футболчи билан мавжуд меҳнат шартномасини бекор қилгани, бир неча футболчи клуб билан шартномаси якунига етгани учун эркин агентга айлангани, шунингдек, 10 декабрь куни “Металлург” МЧЖ ПФК ягона иштирокчисининг 1-сонли навбатдан ташқари умумий йиғилиши ўтказилиб, клуб директори Шавкат Саидов лавозимидан озод этилгани ҳақида билади.
Таъкидланишича, мазкур масалага ойдинлик киритиш мақсадида ЎзПФЛ “Ўзметкомбинат” АЖга расмий мурожаат билан чиқиб, “Металлург”нинг Суперлигадаги иштироки масаласига 24 декабрга қадар ойдинлик киритишни сўраган.
ЎзПФЛ агар “Металлург” мусобақада иштирок этмаса, унинг ўрни қандай тўлдирилиши бўйича тушунтириш берди.
Агар “Металлург” клуби Суперлигада иштирок этиш ҳуқуқидан воз кечса, регламент бўйича унинг ўрни мавсум якунига кўра кейинги ўринни эгаллаган ва лицензиялаш талабига жавоб берадиган бошқа футбол клуби билан тўлдирилиши лозим. Мана шу нуқтада Лига Суперлига учун ўтиш ўйинига эътибор қаратади. Сир эмаски, Суперлигага йўлланма берувчи сўнгги ўйинда “Металлург” ва “Олимпик” жамоалари ўзаро кураш олиб борди. Шундан келиб чиқилса, “Металлург”нинг ўрнини эгаллаши мумкин бўлган кейинги клуб “Олимпик” ҳисобланади.
Агар “Олимпик”да молиялаштириш ва бошқа масалада муаммо ўртага чиқса, Лига у ҳолда регламентнинг 10.2-бандига мурожаат қилади. Пролига мавсуми якунига кўра дастлабки тўрт ўринни қўлга киритган клублар Суперлига йўлланмасига эга чиқди. 5-ўриндан жой олган “Арал” эса ОФК лицензиясини қўлга кирита олмаган. Бироқ 6-ўринни банд қилган “Хоразм”да лицензия мавжуд. Яъни, Суперлига учун “Олимпик”дан кейинги номзод “Хоразм” ҳисобланади.
Шу нуқтада ОАВ томонидан тилга олинаётган “Локомотив” масаласига ҳам тўхталиш мумкин. Жамоа Суперлигада сўнгги ўринни эгаллаб, Пролигага йўл олган. “Локомотив” 2025 йилги мавсумни Суперлигада ўтказиши учун юқоридаги кетма-кетлик амалга ошиши лозим. Яъни, биринчи галда “Металлург” Суперлигада ўйнаш ҳуқуқидан воз кечиши, кейинчалик “Олимпик” ва ундан кейин “Хоразм” клуби бундай имкониятга эга бўлмаслигигина “Локомотив” учун йўл очади. Бу масала Лига Ижроия қўмитасининг йиғилишида кўриб чиқилиши керак бўлади, дейилади баёнотда.
Изоҳ (0)