Суперлига. Бубанянинг лицензияси қайтариб олинди, “Навбаҳор” дарвозабони кескин огоҳлантирилди 

Суперлиганинг 8-туридан ўрин олган 4 учрашув 18—19 май кунлари бўлиб ўтди. 

Андижонда “Металлург”ни қабул қилган водийлик футболчилар дурангга имзо чекди. Учрашувнинг қўшиб берилган дақиқаларида мезбон мухлислари томонидан турли буюмлар отилди. Жисмлардан бири “Металлург” шифокорининг бошига тегиши оқибатида уни жароҳатлади. 

Ушбу вазиятда “Андижон” клуби футболчиси Владимир Бубаня ҳам шифокорга нисбатан қўпол ҳаракатларни амалга оширди. Бу ҳолат ПФЛ эътиборидан четда қолмади ва ташкилот вазиятни баҳолаш учун Тартиб-интизом қўмитасига шикоят аризаси йўллади. 

“Лига футболчининг бу каби ҳаракатига тоқат қилмайди. Футболчилар саломатлиги учун масъул шахсга нисбатан хатти-ҳаракати учун Бубаняга Лига томонидан берилган лицензия вақтинчалик қайтариб олинади”, — дейилади ПФЛ матбуот хизмати берган хабарида. 

Бундан ташқари, ташкилот Ўзбекистон терма жамоаси дарвозабони Ўткир Юсуповни ҳам кескин огоҳлантирди. 

Суперлиганинг 7-тур учрашувида “Сўғдиёна” билан учрашувда қатнашган “Навбаҳор” дарвозабони рақиб жамоа мухлисларига қарата номақбул ҳаракатларни амалга оширган эди. 

8-турдан ўрин олган “Нефтчи”га қарши учрашувда  “Навбаҳор” сўнгги дақиқаларда урилган гол эвазига ғалаба қозонди. Мезбонлар дарвозабони Ўткир Юсупов голни “Нефтчи” мухлислари билан нишонлашга қарор қилди. Бу эса Фарғонадан келган мухлисларнинг жаҳлини чиқарди. 

ПФЛ дарвозабон ишини кўриб чиқиш учун ЎФА тартиб-интизом қўмитасига мурожаат қилган. Бундан ташқари ташкилот дарвозабонга провакацияга учмасликни ҳамда 2022 йилда олинган санкцияларни эслатди. 

“Ҳар қандай профессионал футболчи провокацияларга эътибор қилмаслиги ва, албатта, жамоатчиликни жунбушга келтириши мумкин бўлган хатти-ҳаракатдан тийилиши шарт. Бунга амал қилмаган футболчи миллий терма жамоа аъзоси бўлган тақдирида ҳам Лига мусобақаларига қўйилмайди. 

Лига Юсуповга 2022 йилги мавсумда Пахтакор стадионидаги хатти-ҳаракатлари ва унга нисбатан чиқарилган қарорни, қўшимчасига, у назарда тутган Сўғдиёна посбонининг 2023 йилги мавсум Фарғонадаги хатти-ҳаракати учун олган санкциясини эслатиб ўтади”, — дейилади ПФЛ матбуот хизмати хабарида.