Хитой ташқи ишлар вазири Ван И Европа Иттифоқининг бош дипломатига Пекин “Россиянинг Украинага қарши урушда мағлуб бўлишини қабул қила олмаслигини” айтди. Бу ҳақда CNN хабар берди.
Ван Ининг таъкидлашича, бу АҚШнинг бутун эътибори Хитойга қаратилишига сабаб бўлади. Вазирнинг бу баёноти Пекиннинг можародаги бетарафлик позициясига зид келмоқда.
Европа Иттифоқи ташқи ишлар вазири Кая Каллас Брюсселда 2 июль куни Хитой вакили билан 4 соатлик учрашув ўтказган. Унда “киберхавфсизлик, ноёб минераллар, савдо номутаносиблиги, Тайван ва Яқин Шарқдаги масалалар муҳокама қилинган. Айнан шу учрашувда Ван Россия-Украина борасига ўз фикрини билдирганди.
Кая Калласнинг айтишича, Ваннинг бу фикрлари Пекин Украинадаги урушни давом этишини хоҳлашини англатади. Бу эса Қўшма Штатларни Хитой билан рақобатга эътибор қаратишдан сақлайди. Хитой Ташқи ишлар вазирлигининг 4 июль кунги брифингида расмий Мао Нингдан Россия-Украина уруши ҳақида сўралган.
“Хитой Украина масаласида бетараф. Унинг позицияси объектив ва изчил. Пекин музокара, ўт очишни тўхтатиш ва тинчликни истайди. Узоқ давом этган Украина можароси ҳеч кимнинг манфаатига хизмат қилмайди. Халқаро ҳамжамият билан биргаликда биз ушбу мақсад йўлида конструктив рол ўйнашда давом этамиз”, деди Мао.
Россия Украинага кенг кўламли босқинни бошлашидан бир неча ҳафта олдин Хитой раҳбари Си Цзиньпин Москва билан “чекловларсиз” ҳамкорлик қилишини эълон қилганди. Шундан бери икки мамлакатларнинг сиёсий ва иқтисодий алоқалари мустаҳкамланган.
Пекин, шунингдек, Россияга ҳарбий ёрдам кўрсатаётгани ҳақидаги айбловларни рад этган. Украина Хитойнинг бир қатор компанияларига санкциялар жорий этган. Бунга Пекин Москвага дрон компонентларини етказиб берагани ва ракета ишлаб чиқаришда ёрдам кўрсатгани сабаб бўлган.
Изоҳ (0)