Январь–июль ойларида Ўзбекистон экспорти ҳажми 1,01 фоиз камайди, импорти эса 10,1 фоизга ўсди. Бу ҳақда Статистика агентлиги эълон қилган ҳисоботда келтирилган.
2024 йилнинг етти ойи давомида республика ташқи савдо айланмаси 36,8 миллиард долларга етди. Бу 2023 йил мос давридагидан 1,9 миллиард долларга (5,3 фоиз) кўп. Мазкур ўсиш импорт ҳажми кескин ортгани билан боғлиқ. Хусусан, ташқи савдода экспорт улуши 14 миллиард 786 миллион доллар бўлган. Ўтган йил мос даврида бу кўрсаткич 14 миллиард 954 миллион долларни ташкил этган.
Жорий йил январь–июль ойларида импорт улуши 22 миллиард долларга етган. Таққослаш учун, 2023 йилнинг шу даврида импорт ҳажми 20 миллиард доллар бўлган.
Жорий ҳисобот даврида мамлакат ташқи савдосида қарийб 7,3 миллиард долларлик дефицит шаклланган.
Ўзбекистон ташқи савдосининг юқори улуши Хитой (18,6 фоиз), Россия (18,5 фоиз), Қозоғистон (6,2 фоиз) ва Туркия (4,6 фоиз) давлатларига тўғри келган.
Ташқи савдода Тошкент шаҳрининг улуши 39,9 фоиз бўлиб, 14,7 миллиард долларга етган. Бу республиканинг бошқа ҳудудларига қараганда энг юқори кўрсаткич ҳисобланади. Ташқи савдодаги энг қуйи улушни эса Сурхондарё вилояти қайд этган — 0,6 фоиз (239,2 миллион доллар).
Етти ой давомида экспортининг қарийб 25 фоизи ёки 4,2 миллиард доллари олтин ҳиссасига тўғри келди. Таққослаш учун, 2023 йилнинг мос даврида 5,6 миллиард долларлик олтин сотилган. Ўз ўрнида жорий ҳисобда салкам 2,5 миллиард долларлик саноат маҳсулотлари, 1,1 миллиард долларлик озиқ-овқат маҳсулотлари ва тирик ҳайвонлар экспорт қилинган.
Ҳисобот даврида машиналар ва транспорт асбоб–ускуналари импорти энг катта улушни ташкил этди — 7,8 миллиард доллар (35,4 фоиз). Шу билан бирга, 2,7 миллиард долларлик кимёвий воситалар, 2,5 миллиард долларлик минерал ёқилғи, ёғлаш мойлари, 2 миллиард долларлик озиқ-овқат маҳсулотлари ва тирик ҳайвонлар импорт қилинган.
Изоҳ (0)