Қонунчилик палатаси спикери ўринбосари Одилжон Тожиев “Миллий тикланиш” партияси етакчиси Алишер Қодировнинг ўта ваҳший жиноятлар учун ўлим жазосини тиклаш зарурлигига шама қилинган постига муносабат билдирди.
Тошкентда 9 июль куни уч яшар бола қасддан ўлдирилгани кенг жамоатчилик муҳокамасига сабаб бўлганди. “Миллий тикланиш” партияси етакчиси Алишер Қодиров мурғак болага ваҳшийлик қилган инсон яшамаслиги керак, деб муносабат билдирди.
“Ҳайвонлашиб кетган жиноятчини солиқларимиз ҳисобига соғлиғини сақлаб, қорнини тўйдириб, бошқа инсон бўлиб қолишини кутиб ўтириш — мантиқсиз! Бундайлардан жамиятни тозалаш керак!” — деган эди депутат.
Қонунчилик палатаси спикери ўринбосари Одилжон Тожиев бегуноҳ гўдакнинг умрига зомин бўлган кимсаларнинг яшашга ҳаққи йўқ, дея билдирилган иддао “ўлим жазосини тиклаш керак” дегандек гаплигини, бир қарашда адолатли ва мақбул ечимдек кўринадиган ушбу таклифга мутлақо қўшилмаслигини айтди.
Унинг билдиришича, ўлим жазоси эҳтимолий нохолис ўтказилган тергов ёки нотўғри чиқарилган ҳукм таъсирида жазоланган бегуноҳ инсоннинг ҳаёти бутунлай йўқотилишига олиб келиши мумкин.
“Тарих тирик гувоҳ. Суд қарори қанчалик адолатли кўринмасин, йиллар ўтиб жиноятчи аслида умуман бошқа шахс бўлганлиги аниқланган кейслар жуда кўп. Мисол учун каннибал Чикатило унинг қотиллиги деб бошқа инсон ўлим жазосига ҳукм қилинган”, — дейди Одилжон Тожиев.
Депутатнинг фикрича, ўлим жазоси жиноятчилик даражасига таъсир кўрсатмайди. Жиноятлардан тийиб турадиган самарали воситалардан бири жазонинг шафқатсизлигида эмас, муқаррарлигида намоён бўлади.
“Қолаверса, ўзга бир инсоннинг умрига нуқта қўйишга сабабчи бўлган қотилга ўлим жазосини берсак, ўша ваҳший кимсадан фарқимиз қолмайди. Давлат ўзи бермаган ҳаётни олишга ҳаққи йўқ, деб ўйлайман. Яшаш бу табиий ҳуқуқ!” — деб таъкидлади у.
Сўзининг сўнгида ўлим жазосини тиклаш керак деганларга Конституция китобини совға қилиш кераклигини қўшимча қилди.
Изоҳ (0)