Тошкентда “Файзиобод ГАИ” ҳудудида иссиқ сув қувури ёрилиб кетди (видео)

Миробод тумани ҳокимлиги ижтимоий тармоқларда тарқалган иссиқ сув қувурида авария юз бергани тасвирланган видео юзасидан маълумот берди.

Қайд этилишича, Тошкент шаҳрида иссиқлик тармоқларини гидравлик синовдан ўтказиш ишлари давом этмоқда. Айни ҳолат гидравлик синов вақтида “Файзиобод ГАИ” ҳудудида рўй берган ва шу жойнинг ўзида барча чоралар кўрилган. Ҳодиса оқибатида ҳеч ким жабрланмаган.

20 июндан 2 августгача Тошкент шаҳрида иссиқлик тармоқларининг гидравлик синовлари (механик куч ва зичлик учун юқори босим остида иссиқлик тармоқларининг синовлари) ўтказилади. Синовлар давомида иссиқлик тармоқлари қувурларининг шикастланиши, иссиқ сув йўллар ва йўлакларга чиқиши мумкин. 

Носозликлар аниқланган тақдирда (78) 129-01-85 телефон рақами орқали маълум қилиш мумкин. 

• Аввалроқ Тошкентнинг Юнусобод туманидаги Мойқўрғон ва Қорақамиш кўчалари кесишмаси остидан ўтган 800 диаметрли магистрал сув қувури тешилиб, атрофни сув босгани ҳақида хабар берилган эди.
• “Ўзсувтаъминот” АЖ раҳбарияти иштирокида ўтказилган матбуот анжуманида Юнусободдаги қувур ёрилиши оқибатида қанча ичимлик суви йўқотилгани маълум қилинган.