Тошкент шаҳар Сергели тумани ҳудудидан оқиб ўтувчи Салор каналида сув оқимининг меъёридан ошиқ оқиши сабабли сув тошиши ҳодисаси кузатилди. Бу ҳақда ФВВ матбуот хизмати хабар берди.
Қайд этилишича, туманнинг “Жунариқ” МФЙ Жунариқ кўчаси ҳудудидан оқиб ўтувчи Салор каналида сув оқимининг меъёридан ошиқ оқиши сабабли сувнинг ўзандан тошиш ҳодисаси кузатилган. Натижада дастлабки маълумотларга кўра, “Жунариқ” кўчасида жойлашган 7 та уй ертўласи, ҳовлиси ва 3 та ишлаб чиқариш цехи ҳудудига сув тўпланган.
“Зудлик билан воқеа жойига ФВВ раҳбарияти ва Тошкент шаҳар ФВБ раҳбари бошчилигида қутқарувчилар етиб борган. Аҳоли хонадонларига сув тошиш ҳолати тўлиқ тўхтаган. Махсус техникалар ва сув тортиш мосламаси (мотопомпа)лар ёрдамида қолдиқ сувларни тортиш ишлари амалга оширилмоқда”, — дейилади хабарда.
Ҳодиса оқибатида тан жароҳати олган ва ҳалок бўлганлар йўқ, уйларнинг деворларига зарар етмаган.
Тошкент шаҳар ҳокимлигининг маълум қилишича, маҳалладаги 9 та хонадон ва 3 та ишлаб чиқариш корхонаси ҳудудига сув тошиши кузатилган. Ҳолатни бартараф этишга ФВБдан 9 та махсус техника, 7 та сув тортиш мосламаси, “Тошкент шаҳар сув таъминоти” корхонасидан 2 та водовоз ҳамда Каналлардан фойдаланиш ва уларга туташ ҳудудларни ободонлаштириш бошқармасидан 2 та водовоз жалб этилган.
Аниқланишича, ҳолат Тошкент вилояти Бўзсув ирригация тизимлари бошқармаси томонидан Тошкент шаҳар Каналлардан фойдаланиш ва уларга туташ ҳудудларни ободонлаштириш ҳамда Фавқулодда вазиятлар бошқармаларини ҳам огоҳлантирмасдан Сергели тумани, “Жунариқ” МФЙдан оқиб ўтувчи Жун каналининг ҳамда Чилонзор тумани, Сеул кўчасидаги Бўрижар каналининг сув олиш иншоотлари номаълум сабабларга кўра ёпилгани ҳамда Салор каналига тўлиқ сув очилгани оқибатида юзага келган.
Изоҳ (0)