Андижон ва Фарғона вилоятларида автокредит эвазига харид қилинган автомашиналарни сотиб юбориш ҳолатлари аниқланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Андижон шаҳар бўлими томонидан терговга қадар текширув ўтказилган. Текширувда фуқаро С.К. ҳудудий тижорат банки филиалидан ажратилган кредит эвазига сотиб олинган Chevrolet Equinox русумли автомашинани гаровга қўймасдан, фуқаро Ж.Қ.га 38,5 минг долларга сотиб юбориб, банк манфаатларига 378 миллион сўм зарар етказгани аниқланган.
Шу каби, департаментнинг Қўқон шаҳар бўлими томонидан ўтказилган терговга қадар текширувда Х.А. исмли шахс ва бошқалар фуқаро Ш.Й.нинг ишончига кириб, унинг номига тижорат банки Қўқон филиалидан автокредит ажратилишига эришиб, ушбу кредит эвазига сотиб олинган Equinox русумли автомашинани бошқа шахсларга нақд пулга сотиб юборган ва 326,7 миллион сўмни фирибгарлик йўли билан қўлга киритгани аниқланган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Сурхондарёда хусусий боғча қуриш учун ажратилган 356 млн сўм кредит маблағлари талон-торож қилингани тўғрисида хабар берилганди. Шунингдек, Сирдарёда 10 млрд сўм кредит маблағини ўзлаштирган МЧЖ аниқланган эди.
Изоҳ (0)