Кўксарой қароргоҳида Шавкат Мирзиёев ва Садир Жапаровнинг тор доирадаги учрашуви бўлиб ўтди.
Президент матбуот хизматининг маълум қилишича, суҳбат давомида парламентлар, ҳукуматлар, ташқи сиёсат ва тармоқ идоралари даражасидаги мулоқотлар натижадорлигини ошириш, халқаро ва минтақавий майдонлар, жумладан, БМТ, Жаҳон савдо ташкилоти, минтақа давлатлари раҳбарларининг Маслаҳат учрашувлари, “Марказий Осиё плюс” форматлари доирасида ўзаро қўллаб-қувватлашни давом эттириш зарурлиги таъкидланди.
Ҳамкорликнинг янги иқтисодий кун тартибини шакллантириш муҳимлиги қайд этилди.
Товар айирбошлаш ҳажмини яқин йилларда 2 миллиард долларга етказиш бўйича комплекс чора-тадбирлар ишлаб чиқиш долзарб экани кўрсатиб ўтилди. Куни кеча ўтган бизнес форуми муваффақиятли бўлди, якунида янги келишувлар тўплами қабул қилинди. Бу галги ташриф доирасида қайта тикланувчи энергия манбалари, автомобилсозлик ва тўқимачилик соҳаларида кооперация лойиҳалари ишга туширилади.
Стратегик аҳамиятга эга минтақавий лойиҳаларни, жумладан, Хитой—Қирғизистон—Ўзбекистон темирйўли ва Қамбарота ГЭС-1 қурилишини тез фурсатда амалга ошириш масалаларига алоҳида эътибор қаратилди. Транспорт ва энергетика инфратузилмасини ривожлантириш бўйича янги лойиҳа таклифлари кўриб чиқилди.
Президентлар ҳудудлараро ҳамкорликни, жумладан, Чегараолди вилоятлар ҳокимлари кенгаши доирасида янада кенгайтириш муҳимлигини таъкидлади.
Шунингдек, қишлоқ ва сув хўжалиги, экология, хавфсизлик ва бошқа соҳаларда ўзаро манфаатли ҳамкорликни ривожлантириш масалалари атрофлича муҳокама қилинди.
Маданий-гуманитар алмашинув фаоллашгани мамнуният билан қайд этилди. Бу ҳафта Ўзбекистонда Қирғизистон маданияти кунлари ўтказилмоқда. Куни кеча Самарқандда иккинчи ректорлар форуми муваффақиятли ўтказилди. Томонлар келгуси йилларга мўлжалланган маданий тадбирлар тақвимини тайёрлашга келишиб олди.
Давлат раҳбарлари минтақавий кун тартибидаги томонларни қизиқтирган масалалар юзасидан ҳам фикр алмашди.
Изоҳ (0)